Read luo Wuok 5 Bible Online

Wuok 5 - luo bible

Wuok 5

¹Bang’e, Musa kod Harun nodhi ir Farao, mowachone niya, “Ruoth Nyasaye ma Nyasach jo-Israel owacho kama: ‘We joga odhi, mondo otimna sawo e thim.’ ”

²To Farao nodwokogi niya, “Ruoth Nyasaye to en ng’a, ma dawinj wachne, mi awe jo-Israel dhi? Akia Ruoth Nyasaye, bende ok nawe jo-Israel odhi!”

³Ne giwachone niya, “Nyasach jo-Hibrania oseromo kodwa. Omiyo, yie iwe wadhi e wuodh ndalo adek e thim, mondo watim misango ni ruoth Nyasaye ma Nyasachwa, nono to obiro kelonwa tho, kata lweny ma ditiekwa.”

⁴Farao, ruodh Misri nodwoko Musa gi Harun niya, “Marang’o umono ji tiyo tijegi? Doguru e tiju wasumbnigi!”

⁵Eka nomedo wacho niya, “Jou koro ng’eny moloyo jo-Misri to eka pod udwaro mana ni mondo giwe tich!”

⁶Odiechieng’no, Farao nochiko jo-Misri ma jorit wasumbni kod jo-Israel ma nyipeche niya,

⁷“Kik uchak umi jo-Israel tiang’ ma gilosogo matafari, kaka usebedo ka utimo, to weuru gidhi giom tiang’ giwegi.

⁸To nyaka une ni giloso matafari ma kwan-gi romre gi mago ma gisebedo ka giloso. Kik uwe kwanno dog chien! Gin jonyawo, emomiyo gigoyo koko ni mondo gidhi gitim misango ni Nyasachgi.

⁹Mednigiuru tich matek, mondo gibed modich, kendo giwe chiko itgi e weche manono.”

¹⁰Jo-rit nowuok kaachiei gi nyipeche, mowacho ni jo-Israel niya, “Farao osewacho ni ok obi medo miyou tiang’.

¹¹To ni nyaka udhi udwar tiang’ uwegi kamoro amora moyudoree. To bende nyaka ulos matafari ma kwan-gi romre gi mago muloso pile.”

¹²Omiyo ji noke e piny Misri duto, ka dwaro tiang’.

¹³Jorit ne rungogi kawacho niya, “Odiechieng’ kodiechieng’ nyaka utiek tich momiu, mana kaka nutimo e ndalo mane imiyoue tiang’.”

¹⁴Jodong Farao nogoyo jo-Israel mane giketo nyipeche, ka gipenjogi niya, “Ang’o momiyo kawuono ok ulos matafari marom gi mago ma yande uloso?”

¹⁵Nyipeche ma jo-Israel notero ywakgi ni Farao ka giwachonigi niya, “Ruoth, ere gimomiyo itimonwa kama?

¹⁶Tiang’ koro pok miwa, to eka pod ichunowa ni mondo walos matafari, goch bende igoyowa, to jogi iwuon ema ketho.”

¹⁷To Farao nodwokogi niya, “Un jonyawo ahinya! Mano emomiyo ukwaya ni mondo aweu udhi utim misango ni Nyasachu.

¹⁸Koro doguru e tiju! Ok bi miu tiang’ to nyaka ulos mana kar kwan matafari moketnu!”

¹⁹Kane nyipeche jo-Israel owinjo ni nyaka gilos matafari ma kwan-gi romre mana gi mago ma gisebedo ka giloso, ne gineno ni kara gin e chandruok.

²⁰Ne gia ir Farao mi giromo gi Musa kod Harun ma noyudo ritogi,

²¹mi giwachonigi niya, “Nyasaye mondo one gima usetimo, kendo okumu kuom miyo Farao gi jodonge bedo mamon kodwa. Useketo ligangla e lwetgi mondo ginegwago!”

²²Musa nodok ir Ruoth Nyasaye, mowacho niya, “A Ruoth Nyasaye, ang’o momiyo isando jogi? Koro niora nang’o?

²³Chakre kinde ma nabiroe ir Farao ma awuoyo e nyingi, osemana bedo kosando jogi, to in pok itimoe gimoro mondo iresgi.”