Read luo Wuok 6 Bible Online

Wuok 6 - luo bible

Wuok 6

¹Ruoth Nyasaye nowacho ni Musa niya, “Koro ibiro neno gima abiro timo ni Farao. Abiro chune mondo owe jo-Israel odhi. Adier abiro chune ni nyaka oriembgi e pinye.”

² Nyasaye nowuoyo gi Musa, mowachone niya, “An e Ruoth Nyasaye.

³Nafwenyora ni Ibrahim gi Isaka kod Jakobo ka Nyasaye Manyalo Gik Moko Duto, to ne ok aweyo ging’eya gi nyinga mar Ruoth Nyasaye.

⁴Bende natimo kodgi singruok, kawachonigi ni namigi piny Kanaan, mane ginie jodak.

⁵Koro asewinjo ywak jo-Israel ma jo-Misri oseloko wasumbni, mi aseparo singruok mane atimono.

⁶Omiyo koro nyaka iwachni jo-Israel kama: ‘An e Ruoth Nyasaye, abiro golou e tije mapek ma jo-Misri oketo kuomu, kendo abiro resou e tij bedo wasumbni magi. Narie bada mang’ongo kuomgi, kakumogi malit mondo owaru.

⁷Anakawu ka joga awuon, kendo anabed Nyasachu, mi unung’e ni an e Ruoth Nyasaye ma Nyasachu ma golou e tij jo-Misri mapek michunou mondo uti.

⁸Anateru e piny mane asingora ni nami Ibrahim gi Isaka kod Jakobo, kendo anamiugo mondo obed maru, an e Ruoth Nyasaye.’ ”

⁹Musa noluwo ni jo-Israel wechegi, to ne ok gidewe, nimar chunygi nool nikech tich matek mar bedo wasumbni.

¹⁰Eka Ruoth Nyasaye nowacho ni Musa niya,

¹¹“Dhi nyis Farao ruodh Misri ni nyaka owe jo-Israel oa e pinye.”

¹²To Musa nodwoko Ruoth Nyasaye ni, “Ka jo-Israel ema ok nyal winja, Farao to diwinja nadi, an ng’at maywayo wachni?”

¹³To Ruoth Nyasaye nochiko Musa gi Harun ni gidhi ginyis jo-Israel kaachiel gi Farao ruodh Misri ni Ruoth Nyasaye osemiyogi tich mar golo jo-Israel e piny Misri.

¹⁴Jodong dhoud Israel e magi: Yawuot Reuben ma kach Israel ne gin Hanok gi Palu gi Hezron kod Karmi. Mago e jo-Reuben.

¹⁵Yawuot Simeon ne gin Jemuel gi Jamin gi Ohad gi Jakin gi Zohar kod Shaul wuod dhako ma nyar Kanaan. Mago e jo-Simeon.

¹⁶ To magi e nying yawuot Lawi kaachiel gi nyikwagi: Gershon gi Kohath kod Merari. Lawi nodak higni mia achiel gi piero adek gabiriyo.

¹⁷Joka Gershon ne gin dhout Libni gi Shimei.

¹⁸Yawuot Kohath ne gin Amram gi Izhar gi Hebron kod Uziel. Kohar nodak higni mia achiel gi piero adek gadek.

¹⁹Yawuot Merari ne gin Mali kod Mushi. Mago e dhout jo-Lawi gi nyikwagi.

²⁰Amram nokendo Jokebed nyamin wuon mare, ma nonywolone Harun gi Musa. Amram nodak higni mia achiel gi piero adek gabiriyo.

²¹Yawuot Izhar ne gin Kora gi Nefeg kod Zikri.

²²To yawuot Uziel ne gin Mishael gi Elzafan kod Sithri.

²³Harun nokendo Elisheba nyar Aminadab ma nyamin Nashon, monywologo Nadab gi Abihu gi Eliezar kod Ithamar.

²⁴Yawuot Kora ne gi Asir gi Elkana kod Abiasaf. Mago e dhout joka Kora.

²⁵Eliezar wuod Harun nokendo achiel kuom nyi Putiel, ma nonywolone Finehas. Mago e jodong dhout jo-Lawi.

²⁶Ma e Harun nogo, kaachiel gi Musa, mane Ruoth Nysaye owachonigi niya, “Goluru jo-Israel e piny Misri kochan-gi e dhoutgi.”

²⁷Musa gi Harun gogo ema nowacho ni Farao ruodh Misri ni mondo owe jo-Israel oa Misri.

²⁸Kane Ruoth Nyasaye owuoyo gi Musa e piny Misri,

²⁹nowachone niya, “An e Ruoth Nyasaye. Nyis Farao ruodh Misri weche duto ma abiro wachoni.”

³⁰To Musa nodwoko Ruoth Nyasaye niya, “Ing’eyo ni an ng’at maywayo wach, to ere kaka Farao diwinj wachna?”