Read luo Wuok 7 Bible Online

Wuok 7 - luo bible

Wuok 7

¹To Ruoth Nyasaye nowacho ni Musa niya, “Koro ng’e ni aseketi ka Nyasaye ni Farao, kendo Harun owadu nowuo kari.

²Ininyis Harun owadu weche duto ma abiro chiki mondo iwachi, to en ema nowach ni Farao ni mondo owe jo-Israel oa e pinye.

³ To anami chuny Farao doko matek, kendo named timo ranyisina kod honni maga.

⁴To kata kamano Farao ok nowinju. Omiyo anasand Misri gi timbe madongo kakumo jo-Misri malich, mi nagol joga ma jo-Israel e Misri, kochan-gi e dhoutgi.

⁵Kamano jo-Misri nong’e ni an e Ruoth Nyasaye, katimonigi timbe madongo, kendo kagolo jo-Israel kuomgi.”

⁶Kuom mano Musa gi Harun notimo mana kaka Ruoth Nyasaye nochikogi.

⁷E kinde mane giwuoyoe gi Farao, Musa ne jahigni piero aboro, to Harun ne jahigni piero aboro gadek.

⁸Ruoth Nyasaye nowacho ni Musa gi Harun niya,

⁹“Kapo ni Farao owachonu ni mondo utimne ranyisi moro, to in Musa mondo iwachni Harun kama: ‘Bol ludhi piny e nyim Farao mondo olokre thuol.’ ”

¹⁰Kane Musa kod Harun jobiro ir Farao, ne gitimo kaka Ruoth Nyasaye nochikogi, Harun nobolo ludhe piny e nyim Farao gi joge, mi ludhno nolokore thuol.

¹¹Kane Farao oneno kamano, noluongo ji mariek kod ajuoke, kendo ajuoke mag Misrigo bende notimo mana hono machal kamano gi bindgi.

¹²Ng’ato ka ng’ato nobolo ludhe piny, kendo luth ka luth nolokore thuol, to ludh Harun nomwonyo ludhegi.

¹³To Farao ne wiye tek mana kaka Ruoth Nyasaye nosenyiso, mo nodagi winjo weche Musa gi Harun.

¹⁴Ruoth Nyasaye nowacho ni Musa niya, “Farao wiye tek, kendo odagi weyo jo-Israel mondo oa.

¹⁵Dhiyo ire gokinyi, kodhi e aora Nael, mi irite e dho aora, kiting’o luth mane olokore thuolcha.

¹⁶Nyis Farao kama: ‘Ruoth Nysaye ma Nyasach jo-Hibrania ne oora mondo anyisi ni, we joge oa mondo odhi olame e thim. To nyaka chil kawuono pok isetimo kamano.

¹⁷ Omiyo koro Ruoth Nyasaye owacho ni ibiro ng’eyo ni en e Ruoth Nyasaye kuom gik ma obiro timo. Abiro chwado pi aora gi luth ma ating’oni mi pi biro lokore remo.

¹⁸Rech biro tho, kendo aora biro bedo mang’ue marach, mi jo-Misri ok noyud kaka modho pi aorani.’ ”

¹⁹Ruoth Nyasaye nowacho ni Musa niya, “Nyis Harun kama: ‘Rie ludhi e wi pige duto man Misri, kaka aore madongo gi matindo, kod yewni gi sokni.’ Pi biro lokore remo, kendo piny duto nopong’ gi remo, koda ka dapige mag yien mopa, koda mag kite.”

²⁰Musa gi Harun ne jotimo kaka Ruoth Nyasaye nochikogi. Harun noting’o ludhe malo e nyim Farao gi jodonge, kendo nochwado pi aora Nael, mi pi duto nolokore remo.

²¹Rech notho, kendo aora nodoko mang’ue marach, mi jo-Misri ne ok nyal modho pi aorano. Piny Misri duto nopong’ gi remo.

²²To bang’e ajuoke mag Misri bende notimo hono mana machal kamano gi bindgi, mi wi Farao nosiko matek kaka chon. Notamore winjo wach Musa gi Harun mana kaka Ruoth Nyasaye nosenyiso,

²³kendo noa modok e ode ka ok odewo wachgi.

²⁴Jo-Misri duto nokunyo bath aora Nael mondo giyud pi modho, nikech ne ok ginyal modho pi aora.

²⁵Pi nobet kolokore remo kuom ndalo abiriyo kane Ruoth Nyasaye osechwado aora Nael.