Read luo Wuok 9 Bible Online

Wuok 9 - luo bible

Wuok 9

¹Ruoth Nyasaye nowacho ni Musa niya, “Dhiyo ir Farao mondo inyise ni Ruoth Nyasaye ma Nyasach jo-Hibrania owacho kama, ‘We joga oa mondo odhi olama.

²To ka idagi weyogi,

³to abiro kelo tho marach kuom fareseni gi kenjeni gi ngamiani gi dhogi kod rombi gi dieki.

⁴Jamb jo-Israel to ok abi timonigi gima abiro timoni jamb jo-Misri, mi onge chiach ja-Israel kata achiel ma notho.’

⁵Bende Ruoth Nyasaye oseketo odiechieng’, kowacho ni kiny ema notimie kamano e pinyni duto.”

⁶Kinyne Ruoth Nyasaye notimo kaka nowacho, mi jamb jo-Misri duto notho, to chiach jo-Israel ne ok otho kata achiel.

⁷Kane Farao oneno to nonyise ni onge chiach ja-Israel mane otho kata achiel. To kata kamano wiye ne pod tek, mi ne ok oyie mondo jo-Israel oa.

⁸Ruoth Nyasaye nowacho ni Musa gi Harun niya, “Jukuru buch kendo gi lwetu, mondo Musa okir e kor yamo e nyim Farao.

⁹Buruno biro lokore buru mayom e piny Misri duto, kendoo obiro kelo tuo buche malokore adhonde kuom ji gi jamni.”

¹⁰ Kamano ne gijuko buru e kendo mi gidhigo ir Farao. Eka Musa nokiro buruno e kor yamo, mi buruno nokelo tuo buche ma nolokore adhonde kuom ji gi jamni.

¹¹Ajuoke ne ok nyal piem gi Musa nikech gin bende dendgi ne buche okuodo, mana kaka jo-Misri mamoko.

¹²Ruoth Nyasaye nomiyo wi Farao odoko matek, mi ne ok odewo Musa gi Harun, mana kaka Ruoth Nyasaye nosenyiso Musa.

¹³Bang’e Ruoth Nyasaye nowacho ni Musa niya, “Dhi ir Farao gokinyi mang’ich, mondo inyise ni Ruoth Nyasaye ma Nyasach jo-Hibrania owacho kama: ‘We joga oa mondo odhi olama.

¹⁴To wang’ni, ka ok itimo kamano, to in ema abiro kumi kaachiel gi jodongi kod jogi, kakelonu sand duto mondo ing’e ni onge ng’at marom koda e piny ngima.

¹⁵Ka dine arie bada mi agoyi gi tuo moro, kaachiel gi jogi, to dikoro kari oselal.

¹⁶ To aseweyi ibet mangima mana ni mondo anyisigo tekona, kendo mondo humba olag e piny ngima.

¹⁷To kaka pod ithago joga, kendo ok iyienigi mondo gia,

¹⁸kiny kar sa ma kama, naor pe malich ma pok one e piny Misri nyaka nene.

¹⁹Koro gol chik mondo jambi kod gigi duto man oko orwak e udi, nimar pe biro goyo ji kod jamni mowe oko, mi gibiro tho giduto.’ ”

²⁰Luoro nomako jodong Farao moko nikech gima Ruorh Nyasaye nosewachono, omiyo ne gikelo wasumbgi gi jambgi e udi piyopiyo.

²¹To joma ne ok odewo wach Ruoth Nyasaye noweyo wasumbgi gi jambgi mana oko.

²²Ruoth Nyasaye nowacho ni Musa niya, “Rie lweti kochomo polo mondo pe ogo ji gi jamni kod buya duto man piny e Misri.”

²³Kamano Musa norieyo ludhe kochomo polo, mi Ruoth Nyasaye nooro mil polo kaachiel gi pe mi polo nogoyo piny. Ruoth Nyasaye nomiyo pe ogoyo Misri malich,

²⁴ ka polo mil koni gi koni. Ne en pe marach mane pok one e piny Misri nyaka nene.

²⁵Pe nogoyo gik moko duto, kaachiel gi ji kod jamni mane ni oko kuonde duto e piny Misri. Bende nogoyo buya manie piny, moturo yien duto.

²⁶To mak mana piny Goshen kende mane jo-Israel odakie, ema ne ok ogoyo.

²⁷Farao noluongo Musa gi Harun, mowachonigi niya, “Koro asekotho. Ruoth Nyasaye e man kare, to an, kaachiel gi joga, ema wasetimo marach,

²⁸lamnwa Ruoth Nyasaye, nikech pe gi polo osegoyowa mohingo tekowa. Asingora ni abiro weyou mondo udhi ma ok urito gimoro kendo.”

²⁹Musa nowachone niya, “Ka asea e dalani, to abiro rieyo bada kalamo Ruoth Nyasaye. Polo biro weyo mor, kendo pe bende biro chok mondo omi ing’e ni Ruoth Nyasaye e wuon piny ngima.

³⁰To ang’eyo ni in kaachiel gi jodongi pod ok uluoro Ruoth Nyasaye.”

³¹(Tworo gi shairi nokethore chuth, nimar noyudo ka tworo osetegno, to shairi ne koro eka mino.

³²To ngano ne ok okethore nimar ojachiek achien.)

³³Musa noa ir Farao, mowuok e dala. Eka noting’o bedene malo kolamo Ruoth Nyasaye, mi mor polo gi pe norumo, kendo koth bende nochok.

³⁴Kane Farao oneno ni gigo duto noserumo, nochako oketho, mi chunye, kaachiel gi chuny jodonge nomedo mana bedo matek.

³⁵Kamano wi Farao nomedo bet matek, mi notamo jo-Israel dhi, mana kaka Ruoth Nyasaye nosemiyo Musa owacho.