Read luo Ayub 16 Bible Online

Ayub 16 - luo bible

Ayub 16

¹Ayub nodwoko niya,

²“Asewinjo weche machalo kamago ndalo mathoth, omiyo hocho muhoyago medona mana chandruok.

³Ubiro siko kuloso kamano nyaka karang’o? Ang’o momiyo utamoru ling’?

⁴Ka da bed ni an e un, to an bende dawacho gik moko duto muwachogo. Da agonu wiya ka ng’ama riek, kendo da arogonu gi weche mogundho.

⁵Bende da ang’adonu rieko ma ategogo chunyu, kendo dikoro athoro weche mondo ahougo!

⁶To an to, kata ka aloso, kata ka aling’, to rem ma an-go ok rum.

⁷A Nyasaye, isemiyo aol chuth, kendo isenego joga duto.

⁸Isemaka, kendo ikawa ka jasiki. Adong’ mana choke lilo, kendo ji paro ni mano nyiso ni an jaketho.

⁹Nyasaye jako bedena gi embena ka en gi mirima mager, kendo ojwolona wang’e, ka osin koda.

¹⁰Ji ng’amo dhogi, ka gidwaro chama, bende ginur kuoma, bende githalo lemba.

¹¹Nyasaye osejwang’a e lwet joma timbegi richo.

¹²Chon ne adak gi kue, to Nyasaye ne omaka gi ng’uta, mi owita piny, kendo otura. An ema Nyasaye onena,

¹³Kendo ochiela gi aserni koni gi koni. Gichwowa kendo gihinya, to eka pod ok okecha!

¹⁴Ohinyo denda sa duto, kendo omonja ka jalweny ma chunye okethore.

¹⁵Aywak kendo arwako pien gugru, bende abet abeta e buru ka wiya okuot.

¹⁶Aseywak mi wang’a oowore, kendo okuot ma ok anyal neno,

¹⁷to ok asetimo tim mahundu, kendo alamo Nyasaye gi adiera duto.

¹⁸In piny, kik ipand gik maricho ma osetimna! Kik iyie ng’ato omi aling’, ka aywak mondo ong’adna bura makare!

¹⁹ Nitie ng’ato e polo ma biro chung’ ka chwaka.

²⁰Adwaro mondo ywakna ochop e nyim Nyasaye, kendo owinj lemona.

²¹Bende adwaro ni ng’ato okwana Nyasaye, ka ng’ama kwayo ni osiepne.

²²Hika koro orumo, kendo achomo kuma adhiye chuth.