Read luo Ayub 28 Bible Online

Ayub 28 - luo bible

Ayub 28

¹“Nitie buche ma ikunyoe fedha kendo nitie kuonde ma ipidhoe dhahabu.

²Ji kunyo chuma e lowo, kendo gilenyo mula mondo gigol kuom kite.

³Ji manyo kite kuonde motimo mudho ma ndiwa, kendo gidhi kuonde matut mondo gikunygie.

⁴Gikunyo yore kuonde ma ng’ato pok odakie, kata ma tiend dhano pok onyono. Kuondego gitiyoe kendgi ka giliero e tonde ei buchego.

⁵Lowo to ema chiemo wuokie, to pinyne ibaroe lwendni gi mach.

⁶Lwendnigo ema kite ma nengogi tek wuokie, to buru ema oting’o dhahabu.

⁷Onge otenga maneno yore manie buchego, kendo kata mana wang’ achuth mabith ok nyal nenogi.

⁸Bende onge sibuor kata ondiek mager mawuotho e yore machilgo.

⁹Ji baro lwendni marateke kendo githulo gode gi tiendegi.

¹⁰Gitucho lwendni manie gode kendo giyudoe kite ma nengogi tek.

¹¹Gikunyo nyaka gichop kuonde ma aore ochakoree, ma gigol oko gik mopondo.

¹²Koro rieko to iyudo kanye? Koso ere kuma ng’eyo wuokie?

¹³Rieko ok nyal yud kuom dhano, kendo onge ng’at mong’eyo kuma diyudee.

¹⁴Kuonde matut mag nembe kwer ni, rieko ok nyal yud kuomgi.

¹⁵Rieko ok nyal ng’iew gi fedha kata gi dhahabu,

¹⁶bende dhahabu maler kata kite ma nengogi tek ok nyal romo gi nengone.

¹⁷Nengone tek moloyo fedha, kendo tek moloyo kata mana gima olos gi dhahabu kata marieny ka glas.

¹⁸Nengo mar rieko tek moloyo kite mabeyo duto ma nengogi tek,

¹⁹kendo ber mare ok nyal pim gi dhahabu malerie moloyo.

²⁰Koro rieko to iyudo kanye? Koso ere kuma ng’eyo wuokie?

²¹Onge gima ngima manyalo nene, kata mana winy mahuyo bende ok nene.

²²Koda ka tho gi masira bende oyie ni gisewinjo mana humbe kende.

²³Nyasaye kende ema ong’eyo yo madhi e rieko Ee, mana en ema ong’eyo kuma iyudee.

²⁴Nikech en ema oneno giko piny, kendo en ema oneno gik moko duto manie bwo polo.

²⁵Ka ne Nyasaye omiyo yamo teko, mi opimo duong’ mar nam,

²⁶kendo ka ne oparo kuma koth onego chwee, kod yore ma rumbi biro luwo,

²⁷Eka ne oneno rieko, mopimo berne kaka chal mi nonwang’o ni ober.

²⁸ Bang’e nowacho ni dhano niya, ‘Ka idwaro bedo gi rieko, to nyaka iluor Ruoth Nyasaye, kendo ka idwaro bedo gi ng’eyo, to nyaka iwe richo.’