Read luo Ayub 3 Bible Online

Ayub 3 - luo bible

Ayub 3

¹ Bang’e Ayub ema ne ochako wuoyo, kokuong’o chieng’ mane onywolee,

³“Nyasaye mondo okuong’ odiechieng’ mane onywolae, kendo okuong’ odiechieng’ mane omakie ichna.

⁴Odiechingno mondo olokre mudho! Nyasaye man malo kik chak par odiechiengno! Ler bende kik chak rienyie.

⁵Odiechiengno mondo otim luoch kendo otim mudho mandiwa, ka boche polo oime, kendo wang’chieng’ oimre.

⁶Mudho molil omwony otienono, mondo kik obed achiel kuom ndalo mag higa, kendo kik kwane ka achiel kuom ndalo mag due.

⁷Otienono obed otieno ma ok makie ich nyathi, kendo ma koko mar mor ok winjie.

⁸Ajuoke mondo okuong’ odiechiengno. Ee, mana joma olony kuom golo chik ni Levayathan,[1] mi winjgi, ema mondo okuong’e!

⁹Otienono kik lokre odiechieng’, kendo sulue mar okinyi kik rieny, kata ng’amba bende kik mol.

¹⁰Ee, otienono mondo okuong’, nikech noweyo onywola, mi aneno mana chuny lit kod thagruok.

¹¹Dine ber ka atho ei mama, kata ka atho mana e sa mane onywolae!

¹²Mama nopira e chonge nang’o? Ere gima omiyo ne oyiena adhodho thunde,

¹³nimar ka dine atho e kindeno, to dikoro ayueyo maber,

¹⁴kanindo kaachiel gi ruodhi kod jodonggi mosetho mane ogero udi madongo mabeyo.

¹⁵Kata dikoro anindo mana ka joma omew mane opong’o utegi gi dhahabu kod fedha,

¹⁶kata ka nyithindo monywol kosetho,

¹⁷nimar ei liel ema joma richo weyoe timbegi mag mahundu, kendo jotich mool bende yudoe yueyo.

¹⁸Koda ka joma otue bende yudoe yueyo gi kue kuno, maonge nyapara machikogi gi gero.

¹⁹Ji mopogore opogore ni kanyo, ei liel, joma dongo gi joma tindo machalre, ma kata mana wasumbni bende bedo maonge e bwo chik.

²⁰Ere gimomiyo jomoko inywolo mana ni mondo one thagruok? Koso ji man gi chuny lit iweyo neno chieng’ nang’o?

²¹ Gidwaro tho, to tho otamore negogi. Ee, gidwaro tho moloyo mwandu.

²²Ok ginyal bedo mamor nyaka chop githo, mi yikgi.

²³Ere gimomiyo Nyasaye oweyogi ka gingima, to gibayo abaya e mudho, ka ogeng’onigi koni gi koni?

²⁴Kar chiemo to aywak, bende asiko ka achur achura.

²⁵Gimoro amora ma aluoro oseyuda, kendo gik ma bwoga ema timorena.

²⁶Aonge kue, kendo ok anyal yueyo, nikech chandruokna osiko.”