Read luo Ayub 31 Bible Online

Ayub 31 - luo bible

Ayub 31

¹“Ne asesingora ni ok narang nyako moro, mi agombi.

²Ere gima Nyasaye Manyalo Gik Moko Duto orito timo ni dhano, kendo ere pok morito chulogo timbewa?

³Donge chandruok gi masira ema orito joma timbegi richo?

⁴Nyasaye ong’eyo gik moko duto ma atimo, kendo orango ondamo ka ondamo ma akawo.

⁵Akuong’ora ni pok atimo tim miganga, kata pok atemo wuondo ng’ato.

⁶Nyasaye mondo opima e ratil makare, to obiro nwang’o ni an ng’at makare, kata kapo ni richo omieno lweta,

⁷Ka dipo ni aseweyo yo makare, mi richo oywaya,

⁸to ber mondo chamba okethi, kata jomoko nono ochamgi.

⁹Ka dipo ni asegombo chi wadwa moro, mi apondo e dhoode gi oko ka arite,

¹⁰to chiega mondo obed misumba ng’atno kendo jomoko nono mondo onind kode.

¹¹Mano en tim mamono, kendo tho ema ikumego,

¹²nimar ochalo mach marach manyalo tieko gik moko duto ma an-go.

¹³Pile kane achiel kuom jotichna oywakna, to ne awinje mi atimne gima kare.

¹⁴Ka dine ok atim kamano, to ere kaka dachom Nyasaye tir, koso ere kaka dadwoke ka obiro yala?

¹⁵Donge Nyasaye achiel mane ochueya, e Nyasaye mane ochueyo jotichnago bende?

¹⁶Pok asetamora konyo joma odhier, bende pok aweyo mond liete e thagruok marach,

¹⁷kata mana weyo nyithi kiye kech, ka achiemo, bende pok aweyo,

¹⁸to e ngimana duto asebedo ka aritogi.

¹⁹Kane ayudo ng’at ma jachan ma koyo nego, kendo ma onge gi lewni ma dorwaki,

²⁰to ne amiye lewni molos gi yie romba awuon, mi opaka gi chunye duto.

²¹Kapo ni asewuondo nyathi kich moro, nikech ang’eyo ni daloye e bura,

²²to kara mondo bedena otur, mi jakre gi e goka!

²³To adier ne ok anyal timo gima kamano, nikech aluoro kum malich ma Nyasaye kumogo ji.

²⁴Pok abedo gi geno kuom mwanduna,

²⁵kata sungora kodgi

²⁶bende pok aselamo wang’ chieng’ mang’angnini, kata mana due marieny maberni pok alamo.

²⁷Adier, paro mar timo kamano pok odonjo e chunya.

²⁸Richo ma kamano ikumo gi tho, nimar akwedo Nyasaye Manyalo Gik Moko Duto.

²⁹Ok asebedo mamor ka wasika thagore, kata ka masira omakogi.

³⁰Bende pok aseketho ka alemonigi marach mondo githo.

³¹Ji duto matiyona ong’eyo malong’o ni pile asebedo ka arwako welo.

³²Jowuoth bende aserwako e dalana, kendo pok aweyo ginindo e yo.

³³Ji moko temo pando richogi, an to pok apando maga.

³⁴Ok aseluoro gima ji biro wacho, omiyo ok aseling’ kata siko ei ot ka aluoro achaya margi.

³⁵Mad ng’ato bedie manyalo winja! Akuong’ora ni weche ma asewacho gin adier. Nyasaye Manyalo Gik Moko Duto mondo odwoka Ka da bed ni ng’at modonjona ondiko weche modonjonago,

³⁶to da alierogi e ng’uta mondo ji one, kata da asidhogi e wiya ka osimbo.

³⁷Da anyiso Nyasaye gik moko duto ma asetimo, ka aonge gi wichkuot e nyime.

³⁸Kapo ni asekwalo puodho ma apuro, mi amayo wuon-go,

³⁹kata kapo ni ne achamo cham monyakie, to eka jopur mane opure kech nego,

⁴⁰to ber mondo kuthe gi kayongo ema odong’ie kar cham.” Weche Ayub ogik ka.