Read luo Ayub 32 Bible Online

Ayub 32 - luo bible

Ayub 32

¹Bang’ mano, ji adekgo noweyo dwoko Ayub, nikech ne osiko koparo mana ni ok en jaketho.

²Eka ng’at moro ma nyinge Elihu ne mirima omako, nikech Ayub ne chwakore kendo ni en kare, ni to Nyasaye e jaketho. (Elihu ne en wuod Barakel nyakwar Buz ma ja-Ram.)

³Mirima nomake bende gi osiepe Ayub adekgo, nimar dwoko Ayub malong’o notamogi, to mano ne miyo Nyasaye nenore ka jaketho.

⁴Elihu ne ng’ama tinie moloyo kuom jogo, omiyo ne orito nyaka ng’ato ka ng’ato otieko wuoyo.

⁵To kane oneno ni ji adekgo ok nyal dwoko weche Ayub, iye nowang’,

⁶mi ochako loso, kowacho kama: “An pod atin, to un joma dongo, omiyo ne aluor nyisou gima aparo.

⁷Ne awacho e chunya ni onego awe ulosi, un joma dongo, mondo wapuonjre rieko kuom joma hikgi ng’eny.

⁸To nyaka ung’e ni muya mar Nyasaye Manyalo Gik Moko Duto ema miyo ji rieko, kobiro kuomgi.

⁹Higni mang’eny ok ema mi ji bed gi rieko, kata joma oti ok ema ng’e gik makare.

¹⁰Mano emomiyo koro adwaro ni uchik itu, mondo anyisu gima an aparo.

¹¹Ne achiko ita gi chuny achiel ka uwuoyo, kendo ne arito ka umanyo weche mariek monego uwachi.

¹²Bende ne aling’ ka aketo chunya, mi aneno ka ng’eng’o Ayub otamou.

¹³Koro ere kaka unyalo wacho ni usefwenyo rieko? Nyasaye ema nyaka dwok weche Ayub, nikech dwokogo osetamou.

¹⁴Un ema Ayub osebedo ka loso kodu, to kata kamano, an to ok dadwoke kaka ne udwokeno.”

¹⁵Eka Elihu nowacho ni Ayub niya, “Wach otamo jogi, kendo ok ginyal dwoko wecheni.

¹⁶Gichung’ achung’a kanyo ka onge gima giwachi! Koro pod darit arita, kata obedo ni giling’ kamano?

¹⁷Ooyo, koro abiro chiwo dwokona an awuon, kendo nyisi gima aparo.

¹⁸Ok anyal rito ka pok awuoyo, kendo ok anyal mono weche wuok e dhoga.

¹⁹Ka ok ayudo thuolo mar wuoyo, to abiro barora ka puga mobarore gi chak!

²⁰Ok anyal konyo, to nyaka awuo, eka ayud kue.

²¹Ok abi chwako ng’ato e wachni, kendo ok abi wuondo ng’ato.

²²Adier, an ok ang’eyo kaka iwuondo ji, to bende kapo ni atimo kamano, to Jachuechna dikuma piyopiyo.”