Read luo Ayub 33 Bible Online

Ayub 33 - luo bible

Ayub 33

¹“Koro in Ayub, chik iti maber, mondo iwinj weche ma adwaro wachoni.

²Abiro ng’ogo weche mopong’o chunya.

³Ang’eyo ni wechena duto ni kare, kendo abiro wacho mana adiera.

⁴Roho mar Nyasaye ema ne ochueya kendo omiya ngima.

⁵Koro ikri mondo idwoka, ka inyalo.

⁶In Ayub, wachalre kodi e nyim Nyasaye, nimar waduto ne ochwewa mana gi lowo.

⁷Kuom mano ok onego iluora, kiparo ni abiro hewi e yo moro amora.

⁸Nende achiko ita kiloso, mi awinjo kiwacho ni

⁹ionge gi ketho, kendo pok itimo gimoro marach, to ni iler, kendo ionge gi richo.

¹⁰Ne iwacho ni Nyasaye keto weche moko kuomi mondo oyudgo tiendi, kendo okwani mana ka jasike.

¹¹ Bende niwacho ni odhogo tiendeni gi nyororo, kendo orango gimoro amora ma itimo.

¹²To koro Ayub, anyisi ni iseketho. Nyasaye duong’ moloyo dhano.

¹³Ere gima omiyo iwacho ni Nyasaye ok winj kwayo mar dhano?

¹⁴Kata obedo ni Nyasaye wuoyo e yore mathoth, to onge ng’ama dewo winjo gima owacho.

¹⁵ Nyasaye wuoyo e lek kendo e fweny mabiro ni ji gotieno ka ji nindo.

¹⁶Nyasaye miyo giwinjo gik ma owachoo, kendo luoro makogi ka giwinjo kaka osiemogi.

¹⁷Nyasaye wuoyonigi mondo giwe timo richo, kendo mondo kik gibed joma sungore.

¹⁸Nyasaye ok nowe girum, to oresogi e lak tho hie hie.

¹⁹Nyasaye kelo ni dhano tuo, kendo opong’o dende gi rem mondo orieyego.

²⁰Dho ng’at matuo bedo marach, ma kata mana chiemo mamit manade thing’e athing’a.

²¹Dende dhi adhiya, kendo odong’ choke lilo.

²²Adier, ochiegni dhi e Piny Joma Otho.

²³Kamoro dipo ka achiel kuom malaika gana gi gana mag Nyasaye, maparo ni ng’ato tich monego oti, nyalo konye.

²⁴Malaikano nyalo ng’wonone, mi wach niya, ‘Weyeuru! Ok onego odhi e Piny Joma Otho, nikech an gi gima awarego.’

²⁵Eka dende biroo chako bedo machwe kendo motegno ka dend wuowi.

²⁶Ka olemo, to Nyasaye biro winje, kendo nolam Nyasaye gi mor.

²⁷Eka nowachi e lela niya, ‘Asetimo richo. To kata obedo ni ne ok atimo gik makare kamano, to Nyasaye nong’wonona.

²⁸Ne oresa kuom dhi e Piny Joma Otho, omiyo pod angima.’

²⁹Nyasaye timo gik ma kamago pile pile.

³⁰Adier, oreso ngima dhano, kendo omiye mor mar bedo mangima.

³¹Ayub koro chik iti ni gima awachoni. Ee, ling’ mondo iwe awuo.

³²To ka in gi wach, to wachi mondo awinji. Dang’ abed mamor kapo ni in kare.

³³To ka ok kamano, to ling’ mondo iwinj gima awacho, nimar abiro puonji kaka onego ibed mariek.”