Read luo Ayub 34 Bible Online

Ayub 34 - luo bible

Ayub 34

¹Eka Elihu nodhi nyime kawacho niya,

²“Un joma riek, koro winjuru wechena.

³Ka ubilo chiemo mamit, to ung’eyo ni omit, koro ere gima monou ng’eyo weche mariek ka uwinjo?

⁴Aneno ni en wachwa mondo wang’ad burani.

⁵Ayub wacho ni oonge gi ketho, kendo ni Nyasaye odagi timone adiera.

⁶Bende owacho niya, ‘Ere kaka dariambi ni an jaketho? Kata obedo ni aseyudo rem malit kamano, to eka an jaricho.’

⁷Bende usenenoe ng’at machal gi Ayubni?

⁸Ohero bet e oganda ma timbegi richo, kendo owuotho gi joricho.

⁹Bende owacho ni onge gima ng’ato yudo kuom timo dwaro mar Nyasaye.

¹⁰Un joma riek, koro chikuru itu mondo uwinji. Bende Nyasaye Manyalo Gik Moko Duto ditim gima ok ni kare adier?

¹¹ Ooyo, omiyo ji pok maromo gi timbegi, kendo otimonigi mana kaka owinjore kodgi.

¹²Nyasaye Manyalo Gik Moko Duto ok tim timbe maricho, bende ok otim ni ng’ato gima ok ni kare.

¹³En ng’a mane omiyo Nyasaye teko, kata mane okete mondo orit piny?

¹⁴Ka da bed ni Nyasaye nyalo kawo muche machiwo ngima,

¹⁵to ji duto mangima ditho ka diemo wang’, mi lokre buru kendo.

¹⁶Koro in Ayub, winja, kapo ni iriek adier.

¹⁷Iparo ni ng’ama mon gi adiera nyalo bedo gi loch? Koso in ichayo Nyasaye makare?

¹⁸Nyasaye kwero ruodhi gi jotelo, ka gitimo timbe maricho kendo mamono.

¹⁹Nyasaye ema nochueyo ng’ato ka ng’ato, omiyo ok ochwak achwaka jotelo kayiem nono, bende otimo ni joma odhier gii joma omew mana machalre.

²⁰Ji nyalo tho apoya gotieno. Nyasaye negogi mi gilal nono, kendo kata joma rateke onego ma ok othage.

²¹Orango gimoro amora ma dhano timo,

²²kendo onge mudho kata mandiwa manadi, ma joricho nyalo pondonee

²³Nyasaye ok ket kinde ma oyaloe ji.

²⁴Ok oket bura kodwaro golo jotelo e tich to ogologi agola, kendo oketo aketa moko kargi,

²⁵nikech ong’eyo gik ma gitimo, omiyo oriembogi gotieno motiekgi.

²⁶Okumo joricho e lela, kuma ji duto nyalo nenogie,

²⁷nimar gisebaro, mi giweyo luwe, kendo gijwang’o chikene duto.

²⁸Ne gichuno joma odhier mondo oywag ni Nyasaye, kendo ne owinjo ka gikwaye mondo okonygi.

²⁹Ka Nyasaye otamore timo gimoro ngang’, to onge ng’ama dikwere, kendo ka odagi konyo ji, to ji diyud thagruok.

³⁰Bende onge gima ogendini ditim mondo kik gibed e bwo loch joma thirogi.

³¹Koro in Ayub, bende isehulo ni Nyasaye richoni, mi ikuong’ori ni ok nichak itim richo kendo?

³²Bende isekwayo Nyasaye mondo onyisi kethoni, mi iyie ni kata obedo ni iseketho, to koro ibiro weyo timo richo?

³³To kaka idagi gik ma Nyasaye timo, koro iparo ni bende dotim kaka in idwaro? Kata kamano in ema onego iyier gima itimo, to ok an, omiyo nyiswa gima iparo.

³⁴Ng’ato ang’ata man gi paro, mowinjo gima awacho,

³⁵biro yie ni Ayub wacho gik ma ok ong’eyo, kendo onge gima owacho kata achiel man gi tiende.

³⁶Paruru ane weche duto ma Ayub wacho, to ubiro neno ni owuoyo ka jaricho.

³⁷Odagi weyo timo richo, kendo ocharo Nyasaye, koyanyo e nyimwa waduto.”