Read luo Ayub 35 Bible Online

Ayub 35 - luo bible

Ayub 35

¹Eka Elihu nomedo wacho niya,

²“Ayub, en miriambo wacho ni ionge gi ketho e nyim Nyasaye,

³kata penjo Nyasaye ni, richoni time nadi, koso ni ere gima ber ma iseyudo kuom bedo makare?

⁴Adwaro dwoki kaachiel gi osiepeni adekgi.

⁵Rang ane polo mondo ine kaka boche polo ni kuma bor.

⁶ Ka itimo richo, to mano ok hiny Nyasaye. Koso iparo ni kitimo gik maricho mang’eny, to mano timo Nyasaye gimoro?

⁷To bende ka in ng’at makare ahinya to mano konyo Nyasaye gang’o? Onge gima Nyasaye dwaro kuomi.

⁸Richoni hinyo mana ji weteni, kendo ber mitimo konyo mana gin.

⁹Ka ji yudo thagruok, kithirogi, to gichur kendo giywak ni mondo ng’ato oresgi.

¹⁰To ok giywag ni Nyasaye ma jachwechgi, kendo mamiyogi teko e sa ma masira malich omakogie.

¹¹Ok gidhi ir Nyasaye ma miyo wabedo gi rieko moloyo winy gi le.

¹²Kuom mano, ka giywak ni mondo okonygi, to Nyasaye ok dewgi, nikech gin joma josunga, kendo ma timbegi richo.

¹³Giywak kayiem, nimar Nyasaye Manyalo Gik Moko Duto ok winjgi, bende ok onen-gi.

¹⁴In Ayub, iwacho ni ok inyal neno Nyasaye, to rit arita mos, nikech oseyudo wachni.

¹⁵In iparo ni Nyasaye ok kum ji, kendo ni ok odew richo,

¹⁶omiyo idhi nyime gi wecheni manono, bende nenore malong’o ni ikia gima iwacho.”