Read luo Ayub 36 Bible Online

Ayub 36 - luo bible

Ayub 36

¹Elihu nodhi nyime kawacho niya,

²“Hori mos, mondo imed rito gima awacho, kachwakogo Nyasaye.

³An gi rieko mathoth, omiyo abiro wacho gima ang’eyo, mondo anyisgo ni Nyasaye jachuechna timo mana gik makare.

⁴Onge gimoro ma awachoni ma ok adiera, kendo an ma achung’ e nyimini an mariek adier.

⁵Mano kaka Nyasaye ratego! To kata kamano, ok ocha ng’ato, bende onge gima okia.

⁶Ok owe joricho dhi nyime maber, kendo pile otimo adiera mowinjore ni joma odhier mithiro.

⁷Orito joma kare, kendo omiyo gibedo gi loch ka ruodhi, bende omiyo giyudo duong’ nyaka chieng’.

⁸To ka otue ji gi nyororo, kendo ka giyudo chandruok kuom gik ma gisetimo,

⁹To Nyasaye nyisogi richogi gi sungagi.

¹⁰En ema omiyo gichiko itgi, mondo giwinj siem mosiemogigo, kendo giwe timo richo.

¹¹Ka gimiyo Nyasaye luor, kendo gitiyone, to gidak gi kue kendo gidhi nyime maber e ndalogi duto.

¹²To ka ok gitimo kamano, to githo ka ok ging’eyo gimoro, kendo gidhi e Piny Joma Otho.

¹³Joma ok dew Nyasaye bedo gi mirima kinde duto, kendo ka okumgi, to ok giywagre mondo okonygi,

¹⁴omiyo githo ka pod gitindo ka ngima marach otieko tekregi.

¹⁵To Nyasaye kelo ni ji chandruok mondo opuonjgigo, kendo omiyogi chuny lit mondo wang’gi oyepi.

¹⁶In Ayub, Nyasaye ne ogoli e thagruok, mi omiyi ibedo gi kue, kendo ne omiyi chiemo mang’eny mogundho.

¹⁷To koro sani iyudo kum moromo gi timni.

¹⁸Nyaka ibed motang’ ni timbe mag chamo asoya, bende kik iwe mwandu nyumi e richo.

¹⁹Onge gima ibiro yudo kuom mwanduni, to bende tekri ok nyal konyi sani.

²⁰Kik igomb ni mondo piny oyusi, nikech en e kinde ma ogendini duto biro romoe.

²¹Tang’ mondo kik idonj e richo, nimar chandruok ma in godono ne okelni mana ni mondo omi kik idonj e richo kendo.

²²Parie kaka teko Nyasaye duong’! En e japuonj maduong’ moloyo.

²³Onge ng’ama nyalo nyiso Nyasaye gima onego otim, kata manyalo kwere ni otimo marach.

²⁴Pile ji pako Nyasaye kuom gik ma otimo, omiyo in bende nyaka ipake.

²⁵Ji duto oseneno gik ma otimo, to onge ng’ama ong’eyogi duto.

²⁶Duong’ mar Nyasaye odhiero dhano ng’eyo, kendo kata hike ok wanyal kwano.

²⁷Nyasaye ema kawo pi e nam, to loko koth machue.

²⁸Omiyo koth chue ni ji koa e boche polo.

²⁹Onge ng’ama ong’eyo kaka boche polo ringo, kata kaka polo mor.

³⁰Nyasaye miyo mil polo menyo kor polo duto, chuny nam to dong’ adong’a kotimo mudho.

³¹Mano e kaka opidho ji, komiyogi chiemo mogundho.

³²Omako mil polo gi lwete, kendo ogoyogo gima odwaro.

³³Mor polo nyiso ni kothh maduong’ biro, mi jamni ng’eyo ka obiro.