Read luo Ayub 41 Bible Online

Ayub 41 - luo bible

Ayub 41

¹ “Bende inyalo mako nyang’ [5] gi olowu, kata tueyo lewe gi tol?

²Koso inyalo rwako tol e ume, kata mako dhoge gi mbedo?

³Bende dohombi mondo iweye odhi, kata kwayi mondo ing’wonne?

⁴Koso obiro loso kodi winjruok ni notini nyaka chieng’?

⁵Koso ibiro tugo kode ka winyo manie sigol, kata ka gimoro miywayo gi tol, ma digalgo nyiri ma tiyoni?

⁶Bende jolupo digo nengone? Koso johala diyang’e mondo ong’iew ringe?

⁷Bende inyalo chwowe gi bidhi mang’enymi tuch piene kod wiye?

⁸Ka imule dichiel, to ok nichak imule kendo, bende wiyi ok nowil gi lwenjno!

⁹Ng’ato ang’ata moneno nyang’no, bwok mi gore piny.

¹⁰Ka ng’ato okwinye, to oger malich, kendo onge ng’at ma dihedhre chung’ e nyime.

¹¹Onge ng’ato e piny ngima manyalo monje, mi tony!

¹²We awuonie kuom tiend nyang’no, kendo anyisie kaka oduong’ kendo oratego.

¹³Onge ng’at manyalo yang’o piene, kata ma dituch sare ma ogeng’o dende.

¹⁴Ere ng’ama dimi ong’am dhoge, ma leke malich oriedoe?

¹⁵Dier ng’eye olos gi sare, moriedo machalo okumbni motue kanyakla, kendo matek ka lwanda.

¹⁶Moro ka moro ochom kuom wadgi matek ma kata mana muya ok nyal kadho e kindgi.

¹⁷Adier, oriwgi matek kanyakla, ma onge gima nyalo pogogi.

¹⁸Ka nyang’no ogir, to ler ema mil, kendo wengeni rieny ka wang’ chieng’ ma thinyore.

¹⁹Ligek mach kakni e dhoge, kendo pilni mach wuokie.

²⁰Iro dhuolore e ume mana ka ich yugi michwakogo agulu.

²¹Muche moko mach! Adier, ligek mach wuok e dhoge.

²²Ng’ute tek malich, omiyo ng’ato ka ng’ato moromo kode luor.

²³Onge kamoro ma reprep e piene, to otek ka nyinyo, kendo ok nyal powe.

²⁴Chunye tek ka lwanda, kendo mana ka pong’ rego.

²⁵Ka oa malo, to koda ka joma rateke luoro mako. Ee, kibaji goyogi nyang’eng’o.

²⁶Onge ligangla, kata tong’ kata asere, ma dihinye.

²⁷Gik molos gi chuma yomyomne mana ka tiang’, kendo gik molos gi mula bende yomyomne mana ka yien motop.

²⁸Onge asere ma dimi oringi, kendo kite mobayego chalone mana ka mihudhi.

²⁹Arungu to chalone mana gi tiang’, kendo ka ji baye gi tong’, to onyiero anyiera.

³⁰Bwoye gwa, kendo gwaro piny mana ka ragwar.

³¹Omiyo nam yienyo mana ka dakwon kendo papni mana ka tap mo.

³²Koringo e nam, to ndache lokore rachar, kendo nam lokore buoyo.

³³Onge gimoro e piny ngima minyalo pimo kode, kendo ok oluoro gimoro.

³⁴Ochayo koda ka le magerie moloyo. En e ruodh le duto.”