Read luo Ayub 42 Bible Online

Ayub 42 - luo bible

Ayub 42

¹Eka Ayub nodwoko niya,

²“A Ruoth Nyasaye, ang’eyo ni in gi teko duto, kendo inyalo timo gimoro amora midwaro.

³ Ipenjo ni ere gima omiyo ahedhora penjo riekoni, ka an to amemora kama? Koro ayie ni ne awuoyo kuom gik ma akia, kendo kuom honni modhiera winjo.

⁴ Ne iwachona ni mondo achik ita awinj gima iwacho, kendo atem dwoko weche minyalo penja.

⁵Nyocha abet ka ang’eyo mana gima ji moko nono osewacho kuomi, to koro aseneni gi wang’a awuon.

⁶Omiyo wiya okuot kuom gigo duto ma asewacho kendo achara kenda awuon, ka abet e lowo gi buru.”

⁷Bang’e kane twak Ruoth Nyasaye gi Ayub oserumo, Ruoth Nyasaye nowacho ni Elifaz niya, “Akecho kodi kaachiel gi osiepeni ariyo, nikech un ne ok uwacho adiera kuoma, kaka jatichna Ayub notimo.

⁸Omiyo koro kaw ruedhi abiriyo gi imbe abiriyo, iter ni Ayub mondo utim go misango, upwodhrugo. Ayub biro lemonu, mi nawinj lemone, kendo ok nakuod wiu moromo gi fupu.”

⁹Kamano, Elifaz gi Bildad kod Zofar notimo gima Ruoth Nyasaye nowachonigi, mi Ruoth Nyasaye noyie gi lemo Ayub.

¹⁰ Kane Ayub oselemo ni osiepene adekgo kamano, Ruoth Nyasaye ne omiyo ochako obet maber, mi odwokone gik mane en go, nyadiriyo moloyo mokwongo.

¹¹Owete Ayub duto, gi nyiminene kod osiepene machon, ne obiro lime, mi ochiemo kode e ode. Ne giywage, mi gihoyo chunye kuom thagruok ma yandi Ruoth Nyasaye osekelo kuome, kendo moro ka moro nomiye pesa kod tere mar dhahabu.

¹²Achien Ruoth Nyasaye noguedho Ayub moloyo kaka noseguedhe e ndalo mokwongo. Ayub koro ne nigi rombe alufu apar gang’wen, gi ngamia alufu auchiel gi dhok alufu ariyo, kod kenje alufu achiel. Ne en gi yawuowi abiriyo gi nyiri adek.

¹⁴Nyare makayo nochako ni Jemima, to mar ariyo nochako ni Kesia to mar adek ni Karen-hapuk.

¹⁵Onge nyako moro e piny ngima mane berie ka nyi Ayub. Wuon-gi nolamonigi mwandune, kaachiel gi owetegi.

¹⁶Bang’e Ayub nodak higni mia achiel gi piero ang’wen, mi oneno nyikwaye nyaka tieng’ mar ang’wen.

¹⁷Eka ne otho ka hike oniang’ maber.