Read luo Ayub 5 Bible Online

Ayub 5 - luo bible

Ayub 5

¹In Ayub, luong mondo ine ane ka ng’ato dwoki. Bende nitie malaika ma inyalo ringo ire?

²Sadha nego ng’ama onge rieko, kendo mirima kelo tho ni ng’ama ofuwo.

³An awuon aseneno ng’ama ofuwo kodak maber, to achien opo nono ka ode okuong’.

⁴Nyithinde ok nyal yudo konyruok kendo onge ng’ama ochung’ e bura ka chwakogi.

⁵Ji modenyo chamo chamb ng’ama ofuwono koda ka mago ma dongo mana e kind kuthe kendo mwandune miyo nyiego mako joma riyo oloyo.

⁶Richo ok honre ahona, kata chandruok bende ok bi abiya nono,

⁷to dhano ema kelo ni en owuon chandruok, mana kaka ong’ere ni winy huyo e kor polo.

⁸Omiyo ka da bed ni an e in, to da adhi ir Nyasaye, mi aterone ywakna,

⁹nikech en ema otimo gik madongo, bende honni mage ng’eny mokadho akwana.

¹⁰Okelo koth e piny, kendo omiyo puothe bedo mang’ich.

¹¹Adier, Nyasaye ema ting’o joma odhier malo, kendo oreso joma okuyo.

¹² Oketho cheno mag jowuond,

¹³kendo omako jorieko gi riekogi giwegi, kamano gimoro amora ma gichano kethore.

¹⁴Piny othonigi mudho, kata mana godiechieng’ tir, kendo gimulo amula ka joma wuotho gotieno.

¹⁵To Nyasaye reso joma odhier e tho, kendo okonyo joma ithiro.

¹⁶En ema omiyo joma odhier bedo gi geno, to joma parogi richo ling’ thi.

¹⁷ Ng’at ma Nyasaye kwero en jahawi, omiyo kik imak wach e chunyi ka Nyasaye okumi.

¹⁸ Ka Nyasaye ochwadi ma iriemo, too en ema othiedho kanyo. Ee, lwedo mohinyino ema changi.

¹⁹E kinde ka kinde obiro resi kuom hinyruok.

²⁰Ka kech owuok, to enoriti ibed mangima, kendo kata ka lweny nitie, to enoresi e tho.

²¹Nyasaye noresi kuom weche ma ji hangigo kendo nogoli kuom masira.

²²Kata timbe mahundu kata kech biro, to ininyiergi anyiera, kendo kata mana ondiegi bende ok niluor.

²³Puotheni ok nobed gi lwendni e igi, kendo ondiegi ok nomonji.

²⁴Inidag e hembi gi kue kendo ka irango rombi, to iniyud ka onge moro molal.

²⁵Nyithindi nobed mang’eny ka lum,

²⁶kendo inidag aming’a, mi itho ka ndaloni ogik kare, mana ka cham mochiek maber mokel kar dino.

²⁷Ayub, wasepuonjore wechegi kuom ndalo mang’eny, mi koro wang’eyo ni gin adier, omiyo in bende yie kodgi.