Read luo Ayub 6 Bible Online

Ayub 6 - luo bible

Ayub 6

¹Ayub nodwoko kama:

²“Ka da bed ni inyalo pimo chandruok gi lit ma an-go,

³to da oyud ni gipek moloyo kuoyo duto mae dhonam. Mano omiyo wechena osebedo mager kamano.

⁴Nyasaye Manyalo Gik Moko Duto osechiela gi aserni mage, kendo kwichgi landore e denda duto. Adier, masiche moa kuom Nyasaye olwora koni gi koni.

⁵Kanyna ka chamo lum to oling’ thi, kendo dhiang’ bende ka chiemo to ok oywagi.

⁶To ere ng’ama dicham chiemo maboth maonge chumbi? Koso nyuka mar pi bende nigi ndhadhu?

⁷Ok ahero chiemo machal kamago, bende gimoro amora ma achamo miyo ang’ok.

⁸Mad Nyasaye timna gima akwaye! Ang’o momiyo ok otimna gima adwaro?

⁹Adwaro mondo onega chuth,

¹⁰kendo ka anyalo ng’eyo kamano, to da abedo mamor, kata obedo ni an gi rem machal nadi, nikech nyaka nene pok asedagi chik Nyasaye.

¹¹Ere teko ma pod adong’go, ma dimi abed mangima?

¹²Uparo ni denda en lwanda? Koso ringra en chuma?

¹³Aonge teko ma odong’ ma daresrago, kendo onge kuma daring adhi akonyrae.

¹⁴E kinde ma ng’ato nigi chandruok kama, to odwaro mana osiepe mawinjo wachne, bed ni osejwang’o Nyasaye, kata pok ojwang’e.

¹⁵To un osiepena, uwuonda mana ka aore maduono ka koth ongee.

¹⁶E ndalo koth, to pe maleny ewi gode lokore ohula, kendo pong’ogi apong’a.

¹⁷E ndalo oro to igi dong’ nono kotwo.

¹⁸Joma wuotho e thim rwenyo ka dwaro pi. Gibayo abaya kendo githo kuno.

¹⁹Ee, jowuoth moa Sheba gi Tema manyo aore,

²⁰to ka ginwang’ogi, to giyudo ni pi ma gigeno yudo ongee.

²¹Un to uchalona mana gi aorego, nikech uneno kaka achalo, to ubwok.

²²Bende asekwayou mondo umiya gimoro? Kata ni mondo ugol mwandu

²³uwarago e lwet wasika, kata e lwet jomecho?

²⁴Koro puonjauru, kendo nyisauru kethona. Abiro ling’ mondo awinj wachu.

²⁵Adier, wach makare nyalo miyo ayie, to un uwacho mana weche manono.

²⁶Ere gima omiyo umino koda wach, to wechena mag thagruok to ukwano mana ka yamo ma kudho?

²⁷Un joma digo ombulu nyathi kich mondo obed misumbau, kendo di uho osiepeu mondo uyud mwandu kuomgi!

²⁸Koro ng’iuru koni mondo uranga tir. Uparo ni adwaro wuondou koso?

²⁹Paruru ane, mondo uwe ng’adona bura marach. Weuru thaga, nikech an kare.

³⁰Un pod uparo ni ariambo ariamba, kendo uparo ni ok ang’eyo pogo gima ber gi gima rach!