Read luo Ayub 7 Bible Online

Ayub 7 - luo bible

Ayub 7

¹“Thagruok ma dhano nigo e piny chalo mana gi ngima ng’at moter e lweny gi thwon, kendo mana ka tich lwedo matek,

²kata ka misumba ma gombo yueyo e tipo mang’ich, kendo ka jatich madwaro misache.

³Kamano e kaka atiyo tich matek due ka due, kendo ayudo kuyo otieno kotieno.

⁴Ka adhi nindo, to piny ok ru piyo. Ajony otieno duto, kendo agombo ni piny oru.

⁵Kudni opong’o denda, kendo buru oima, kendo adhondena chuer tutu.

⁶Ndalona ringo matek motamore gi nono, kendo girumo piyo ma onge geno.

⁷A Nyasaye, par ni ngimana chalo yamo, kendo morna oserumo.

⁸Koro inena sani, to ok nichak inena kendo, bende ka iranga, to ok iniyuda.

⁹Kaka bor polo duono kendo olal nono,

¹⁰kendo wi ji duto mong’eye wil kode.

¹¹Ooyo, ok daling’! Mirima ohinga, kendo chunya lit, omiyo nyaka alosi.

¹²Ruoth Nyasaye, ang’o momiyo ikwaya? Koso iparo ni an ondieg nam?

¹³E kinde ma arierae piny mondo ayue, ka aparo ni abiro yudo kue,

¹⁴to in imiyo lek gi fweny malich bwoga.

¹⁵Omiyo adwaro mondo adera moloyo bedo mangima kaka achaloni!

¹⁶Chunya osea, kendo aol gi bedo mangima. Weya, nikech ngimana onge tiende.

¹⁷ Yaye, Ruoth Nyasaye, ang’o momiyo ikawo dhano mapek? Koso ere gima omiyo idewe,

¹⁸momiyo ilime okinyi kokinyi, kendo iteme sa duto?

¹⁹Ok diwe amwonyie olawo?

²⁰In jang’i jini, ere gima obadhi ka atimo richo? Ang’o momiyo an ema inena, koso ere gima omiyo achando chunyi?

²¹In donge diwenae richona? Koso ok ding’wonnae timbena maricho? Piyopiyo nono, abiro nindo e liel, kendo ka imanya, to ok niyuda.”