Read luo Zaburi 102 Bible Online

Zaburi 102 - luo bible

Zaburi 102

¹A Ruoth Nyasaye, chik iti ni lemona, kendo winj ywakna mondo ikonya.

²Kik ipandna wang’i ka an e chandruok, to chik iti mondo iyie idwoka piyo ka aluongi.

³Ngimana lal nono mana ka iro, kendo denda wang’ ka mach.

⁴Chunya ool mana ka lum moner, kendo dhoga rach ma ok anyal chiemo.

⁵Achur matek, kendo adong’ mana choke lilo.

⁶Achalo gi winyo modak kende e thim, kata ka tula modak e gunda.

⁷Ariera piny, to nindo otamore tera. Achalo gi winyo mong’ichno kende ewi tado.

⁸Wasika yanya pile odiechieng’ duto, kendo jogo majara kuong’o ji gi nyinga.

⁹Buru e chiemba, kendo pi wang’a ton kuom gima amadho,

¹⁰nikech mirimbi mager. Iseyudha, mi iwita mabor!

¹¹Ngimana kadho piyo manaa ka tipo mar odhiambo, kendo achalo gi lum maner.

¹²To Ruoth Nyasaye, in ruoth nyaka chieng’ kendo tienge duto nopari.

¹³Ibiro a malo mi ikech Sayun, nikech kinde osechopo monego kechee bende mae sa mowinjore.

¹⁴Jotichni ohero Sayun, kata obedo ni okethe kamano! Adier, kataa obedo ni odong’ mana gunda, to pod gikeche akecha.

¹⁵Ogendini duto nomi nying Ruoth Nyasaye duong’, kendo ruodhi mag piny noluor tekone.

¹⁶E kinde ma Ruoth Nyasaye nochak ogerie Sayun kendo, to enothinyre gi duong’.

¹⁷Enowinj ywak joge mosejwang’, kendo enochik ite ni lemogi.

¹⁸Nyaka ndik gik ma Ruoth Nyasaye osetimo, mondo joma biro mapok onywol, chieng’ moro opake.

¹⁹Ruoth Nyasaye norango piny gi e kar dakne maler man malo. Ee, nong’iyo piny gi e polo,

²⁰mondo owinj ywak ma joma otue ywakgo, kendo mondo ogony jogo mane ong’adnigi buch tho.

²¹Kuom mano, ji nohul nying Ruoth Nyasaye e Sayun. Adier, ginipake e Jerusalem,

²²e kinde ma ogendini gi ruodhigi nochokre kanyakla mondo olame.

²³Ruoth Nyasaye nomiyo abedo mayomno kapod atin, kendo osemiyo ngimana ong’adore machiek.

²⁴In Ruoth Nyasaye to ingima nyaka chieng’.

²⁵ Chon gi lala ne ichueyo piny, kiketo mise mare, kendo ne iloso mise mare gi lweti iwuon.

²⁶Gin to ginirum; in to isiko mochwere. Giduto ginidok moti, kaka law doko moti, kendo inilokgi kaka iloko law mi girum chuth.

²⁷In to isiko mana in, kendo hiki ok norum

²⁸Kuom mano, nyithindwa nodag gi kue, kendo pile inirit nyikwagi.