Read luo Zaburi 104 Bible Online

Zaburi 104 - luo bible

Zaburi 104

¹A yaye chunya, pak Ruoth Nyasaye! Mano kaka iduong’, A Ruoth Nyasacha! Irwakori gi loch kod duong’,

²kendo iumori gi ler mana kaka ng’ato umore gi law. Ne iyaro polo mana ka hema,

³mi igero dalani e pige man malo. Boche polo ema iidho ka gachi mar lweny,

⁴ Ioro yamo ka joreni, kendo mil polo ema iketo jotichni.

⁵Iseguro piny ewi mise mare, mondo kik ong’ingni ngang’

⁶Ne irwako nam kuome, mana ka ng’ama orwake gi kandhu, mi pi noimo gode.

⁷To kane ikwero pigego, ne giringo mi gia. Adier, kane giwinjo kigolo chik kikok,

⁸ne giwalore gia ewi gode, mi giridore ewi holni nyaka kuonde mane iselosonigi.

⁹Eka ne iketonigi tong’ ma ok ginyal kadho, mondo kik gichak giim piny kendo.

¹⁰In ema imiyo pi sokni bubni e holni, kendo mol e kind gode.

¹¹Kamano le ma e bungu yudo pi modho, kendo magwar nego riyo mohewogi.

¹²Winy gero utgi, kendo ywak mamit e yien ma dongo but aorego.

¹³Ioro koth gie polo, mondo ochue e gode, kendo guethni opong’o piny.

¹⁴Imiyo lum loth ni jamni, kaachiel gi alode ma dhano chamoo, mondo oyud teko mopurogo,

¹⁵eka oyud divai ma miye mor, kod mor zeituni mamiyo obedo mail, kaachiel gi kuon mamiyo obedo motegno.

¹⁶Yiend sida mag Lebanon yudo koth mang’eny, kendo ng’ich. Gin yiend Ruoth Nyasaye mane opidho owuon.

¹⁷Winy gero utgi e bedegi. Nyamnaha too gedo e bedegi man malo moloyo.

¹⁸Ngau mae thim dak e gode maboyo, to lwendni morokore ema apwoche bwokie.

¹⁹Ne ichueyo due mondo onyis kinde mitimoe sewni. Chieng’ bende ong’eyo sa ma opodhoe.

²⁰Ne iloso otieno, kendo ka piny lil, to le duto manie bungu wuok oko.

²¹Sibuoche ruto, kadhi dwaro chiemo. Gimanyo chiemo ma Nyasaye miyogi.

²²Ka chieng’ wuok to gidok e bungu, kendo ginindo e gondegi.

²³Dhano to wuok dhi e tichne, kendo tiyo nyaka odhiambo.

²⁴A Ruoth Nyasaye, isechueyo gik mang’eny ahinya! Mano kaka ne ilosogi gi rieko matut! Piny opong’ gi gik misechueyo.

²⁵Ne ichueyo nam maduong’ kendo malach, kama gik moko madongo gi matindo mokadho akwana odakie.

²⁶ Yiedhi kwang’ie, kendo ondieg nam mane ichueyo, miluongo ni Levayathan, tugoe.

²⁷In ema girangi giduto, mondo imigi chiemo e sa ma kech ohewogi.

²⁸Chutho, kimiyogi, to gichamo. Ee, kiyawonigi lweti, to giyieng’.

²⁹To ka ipandonigi wang’i, to githagore, mi gidog e lowo kuma ne giaye!

³⁰To ka imiyogi muya, to gibedo mangima. Kamano imiyo gibedo gi ngima manyien

³¹Duong’ maler mar Ruoth Nyasaye mondo osik nyaka chieng’, kendo onego obed mamor gi gik mane ochueyo.

³²Ka orango piny, to piny tetni, bende ka omulo gode, to gode dhuolo iro.

³³Abiro wer ni Ruoth Nyasaye kuom ngimana duto. Adier, abiro dendo Nyasacha e kinde duto ma pod angima.

³⁴Mad obed mamor gi wenda, nikech en ema omiyo abedo mail.

³⁵Onego tiek joricho e piny. Adier, joma timbegi mono mondo olal nono. A chunya, pak Ruoth Nyasaye! Ee, wadendeuru!