Read luo Zaburi 105 Bible Online

Zaburi 105 - luo bible

Zaburi 105

¹Gouru erokamano ni Ruoth Nyasaye, kendo lameuru. Bende nyisuru ogendini gik ma osetimo.

²Werneuru, kendo pakeuru. Huluru gik madongo duto mosetimo.

³Beduru mamor nikech wan joge. Un duto mutiyo ni Ruoth Nyasaye, beduru mail.

⁴Dhiuru ire mondo okonyu, kendo beduru kode kinde duto.

⁶Un nyikwa Ibrahim jatichne, kendo ma nyikwa Jakobo ng’ate moyiero, paruru honni mage malich kendo madongo, kaachiel gi buche mane ong’ado.

⁷En e Ruoth Nyasaye ma Nyasachwa, kendo tekone okwako piny ngima.

⁸Obiro rito singruokne nyaka chieng’ kuom tienge gana gi gana.

⁹ En singruok mane otimo ni Ibrahim, kendo mane otimo ni Isaka.

¹⁰ Ee, Ruoth Nyasaye notimo singruok ma ok rum ni Israel. En winjruok mochwere mane otimo ni Jakobo, kowacho niya,

¹¹“Anamiyi piny Kanaan mondo obed mwanduni gi nyikwayi.”

¹²Jo-Nyasaye ne nok, kendo ne gin mana jodak e pinyno.

¹³Ne gibayo e pinje gi pinje, ka gidak kuonde mopogore opogore,

¹⁴ to Ruoth Nyasaye ne ok oyie mondo ng’ato othirgi, nikech noherogi. Bende ne okwero ruodhi, kowachonigi niya,

¹⁵“Kik umul joga maseyiero, kendo kik utim ni jonabi maga marach.”

¹⁶ Kane Ruoth Nyasaye okelo kech e pinygi, motieko pinygi duto,

¹⁷ ne oyudo osemiyo ong’iew Josef ka misumba, mondo oore otel nyimgi.

¹⁸ Ne otueye gi nyororo, mohinyo tiendene. Ng’ute bende ne otue gi ratege,

¹⁹nyaka gima ne osekoro otimore. Wach Ruoth Nyasaye ne onyiso ji gima ne Josef okoro en adier.

²⁰ Bang’e ruodh Misri ne ogonye. Ee, ruoth mane rito pinje noweye mobedo thuolo.

²¹ Ne okete jatelo mondo orit pinje duto.

²²Ne omiye teko duto kuom jodonge, kendo mondo ogol chike ni jong’ad ni ruoth rieko.

²³ Bang’e Jakobo nodhi Misri, mi odak e piny nyikwa Hamno.

²⁴ Ruoth Nyasaye nomiyo joge nyithindo mang’eny, kendo nomiyo gibedo motegno moloyo wasikgi.

²⁵Ee, nomiyo jo-Misri obedo mamon gi joge, mi gibedo ka gitiyo kodgi e yor miganga.

²⁶ Bang’e ne ooro jatichne Musa, kod Harun mane oseyiero.

²⁷Ne ginyiso jo-Misri teko mar Nyasaye, ka gitimo honni e pinygi.

²⁸ Nyasaye ne ooro mudho e piny, mi piny olil ti, to kata kamano jo-Misri ne ok odewo chikene.

²⁹ Ne oloko aore maggi remo, mi onego rech pep.

³⁰ Oguende ne opong’o pinygi koda ka ut ruoth.

³¹ Nyasaye ne ogolo chik, mi lwang’ni kod kikun opong’o piny.

³² Kar kelo koth e pinygi, to nokelo mana pe kod mil polo,

³³kokethogo yiendgi mag mzabibu kod ng’owo, kendo koturogo yien mamoko duto.

³⁴ Ne ogolo chik, mi dede mokadho akwana obiro,

³⁵mochamo oboke duto ma e piny, kaachiel gi cham mae puothe pep.

³⁶ Ne onego nyithindo machwo makayo duto, ma yawuot Misri mabeyoe moloyo.

³⁷ Eka ne otelo ni jo-Israel, mogolo e piny Misri, ka giting’o fedha gi dhahabu. Giduto ne dendgi ber kendo gijing’.

³⁸Jo-Misri ne obedo mamor, nikech ne giluorogi.

³⁹ Nyasaye ne oyaro bor polo ka pasia mondo ogeng’go joge, bende ne omiyogi mach mamenyonigi gotieno.

⁴⁰ Ne gikwayo gima digicham, mi okelonigi aluru, kendo nomiyogi chiemo moa e polo mondo gicham giyieng’.

⁴¹ Ne obaro lwanda, mi pi obubnie, kendo pigno nomol e piny mana ka aora.

⁴²Notimo kamano nikech ne oparo singruokne maler, mane otimo ni jatichne Ibrahim.

⁴³Kuom mano ne otelo ni joge moyiero, mi ogolo oko ka wer gi ilo.

⁴⁴ Ne omiyogi pinje jomoko nono, mi gikawo puothe ma jogo osepuro,

⁴⁵mondo gimak chikene, mi girit buchene. Ruoth Nyasaye omi duong’!