Read luo Zaburi 106 Bible Online

Zaburi 106 - luo bible

Zaburi 106

¹ Pakuru Ruoth Nyasaye! Bende goneuru erokamano nikech ober, kendo herane mosiko ochwere.

²Ere ng’ama nyalo hulo gik moko duto mosetimo? Koso en ng’a manyalo pake moromo?

³Joma orito chikene, kendo ma pile timo gik makare, gin johawi!

⁴A Ruoth Nyasaye, para, chieng’ mikonyo jogi, mondo abed achiel kuomgi kiwarogi.

⁵We aneye kaka jogi dhi nyime maber, mondo an bende abed mamor e ogandani, kendo awer kaachiel kodgi.

⁶Wasetimo richo kaka kwerewa notimo. Adier, wasebedo joricho ma timbegi mono.

⁷ Kwerewa ne ok owinjo tiend honni malich, mane Nyasaye otimo e piny Misri. Wigi ne owil gi timbe mathoth mane nyiso herane, mi ne gipiem kode e Nam Makwar.

⁸To kata kamano, ne oresogi kaka ne osesingore, mondo onyisgo tekone maduong’!

⁹ Ne ogolo chik, mi Nam Makwar oduono, eka ne otelo ni joge mong’ade, mana ka gima en lowo motwo.

¹⁰Kamano ne oresogi kuom jogo mane mon kodgi. Adier, nokonyogi e lwet wasikgi.

¹¹Pi noimo wasikgi ma onge kata achiel modong’

¹² Bang’e joge noyie ni wechene gin adier, mi giwerone wende pak.

¹³To piyopiyo nono wigi ne owil gi gima ne osetimonigi, mi gichako gitimo gik moko ka pok gipenje mondo ong’adnigi rieko.

¹⁴ Wuoro ne omakogi e thim, mi gitemo Nyasaye ka gikwaye ring’o.

¹⁵Kuom mano ne omiyogi, to kata kamano, ne okelonigi tho malich.

¹⁶ Kane pod gin e thim, nyiego ne omakogi gi Musa, kendo gi Harun, jatich mowal ni Ruoth Nyasaye.

¹⁷Eka piny nobarore momwonyo Dathan, kaachiel gi Abiram kod joode.

¹⁸Mach ne omwoch kuom joma ne luwogi, mi owang’o joma richogo pep.

¹⁹ Jo-Israel noloso nyaroya mar dhahabu ka gin Horeb, mi gilamo kido manonono.

²⁰Ne giwilo duong’ mar Nyasaye, mana ka kido mar chiayo machamo lum!

²¹Wigi ne owil gi Nyasaye mane oresogi gi timbene madongo e Misri.

²²Ee, wigi nowil gi honni miwuoro mane otimo e piny nyikwa Ham, kod gik malich mane otimo e Nam Makwar.

²³Kuom mano Nyasaye nowacho ni obiro tieko joge, to Musa jatichne moyiero nochung’ e kinde gi ji, mondo ogeng’ mirimbe kik tiekgi.

²⁴ Bang’e ne gichayo piny maber mane omiyogi, nikech ne ok giyie ni singruok mar Nyasaye en adier.

²⁵Ne gisiko mana e hembegi ka ging’ur ang’ura, kendo ne gitamore winjo wach Ruoth Nyasaye.

²⁶Mano nomiyo osiemogi, kowachonigi ni obiro miyo githo e thim,

²⁷ kendo obiro keyo nyikwagi e kind ogendini mamoko nono, komiyo githo e pinje jogo.

²⁸ Bang’e jo-Nyasaye ne oriwore e lamo Baal ka gin Peor, kendo ne gichamo misengni motim ni nyiseche maonge ngima.

²⁹Timbegigo nomiyo Nyasaye mirima, mi tho marach ogoyogi.

³⁰To Finehas nokumo joma notimo richogo, mi tuo marachno norumo.

³¹Gima notimono osemiyo ikwane ka ng’ama kare kendo pod ibiro kwane kamano kuom tienge duto mabiro.

³² Jo-Israel nomiyo Nyasaye mirima e sokni mag Meriba, kendo gima ne gitimono nokelo ni Musa chandruok.

³³Ne gimiyo iye owang’, mi ochadho wach.

³⁴ Ruoth Nyasaye nosechikogi mondo gineg ogendini mokiewo kodgi,

³⁵to kar timo kamano, ne gikendore akenda kodgi, mi giluwo timbegi.

³⁶Kuom mano jo-Nyasaye nolamo kido mag nyiseche manono, mi mano nolokorenigi obadho.

³⁷ Ne gichiwo yawuotgi gi nyigi ka misengni ni nyiseche mag jopinje mamoko nono.

³⁸ Adier, ne gichwero remb yawuotgi gi nyigi ma onge ketho ka gichiwonigi ni nyiseche manono mag Kanaan, mi piny nodoko mogak nikech remo ma nochuerno.

³⁹Gin bende ne gidoko mogak gi timbegi modwanyorego, mi giweyo luwo Nyasaye.

⁴⁰ Kuom mano, Ruoth Nyasaye nokecho kodgi. Chutho nojok kodgi, kata obedo ni gin joge mane oyiero kamano.

⁴¹Ne ojwang’ogi e lwet ogendini mamoko nono, mi gibedo e bwo loch joma mon kodgi.

⁴²Bende wasikgigo ne othirogi, mi olokogi wasumbgi.

⁴³Ruoth Nyasaye nokonyo joge ndalo mang’eny, to gin ne gihero mana piem kode, mi richogi odwokogi chien.

⁴⁴Kata kamano, kane giywak, to nowinjogi, mi oneno chandruok ma gin go.

⁴⁵Ne oparo singruok mane otimonigi, mi oloko parone nikech herane maduong’,

⁴⁶komiyo joma ne oseterogi e tuech okechogi.

⁴⁷ Reswa, A Ruoth Nyasaye ma Nyasachwa, kendo golwa kuom ogendini mamoko, iduogwa e pinywa, mondo wapak nyingi maler, kendo wayud mor kuom goyoni erokamano.

⁴⁸Wadenduru Ruoth Nyasaye ma Nyasach Israel higni gi higni. Ji duto mondo owach niya, “Obed kamano!” Pakuru Ruoth Nyasaye!