Read luo Zaburi 107 Bible Online

Zaburi 107 - luo bible

Zaburi 107

¹ Gouru erokamano ni Ruoth Nyasaye, nikech ober, kendo herane mosiko ochwere.

²Konyauru pako Ruoth Nyasaye un duto ma osewaro. Osekonyou e teko wasiku,

³kendo oseduogou, kogolou e pinje mamoko, chakre yo wuok chieng’ nyaka yo podho chieng’, kendo chakre yo nyandwat nyaka yo milambo.

⁴Jou moko nobayo abaya e thim kendo ne ok ginyal yudo mier ma gidakie.

⁵Kech nokayogi, kendo riyo noloyogi, mi geno mane gin go orumo.

⁶To kane gin e chandruok kamano, ne giywak ni Nyasaye mondo okonygi, mi ogologi e chandruokgino.

⁷Ne otelonigi e yo mochikore tir, nyaka ne gichopo e dala ma ginyalo dakie.

⁸Onego gigo erokamano ni Nyasaye kuom herane mosiko, kendo kuom gik miwuoro mane otimonigi.

⁹Ng’ama riyo oloyo, ne omiyo pi modho, mi orome. Ng’ama odenyo to nomiyo oyieng’ gi gik mabeyo.

¹⁰Joma moko to nodak e mudho, kendo e tipo mar tho. Ne gin joma thagore motue gi nyororo,

¹¹nikech ne gipiem gi Nyasaye Maduong’ Moloyo, ka gidagi mako chikene.

¹²Tich matek ne oologi mi gipodho piny, to onge ng’ama ne nyalo konyogi.

¹³To kane gin e chandruok kamano, ne giywak ni Nyasaye mondo okonygi, mi ogologi e chandruokgino.

¹⁴Ne ogologi oko e mudho, kendo e tipo mar tho, mi ochodo nyororo mane otuegigo.

¹⁵Onego gigo erokamano ni Nyasaye kuom herane mosiko, kendo kuom gik miwuoro mane otimonigi!

¹⁶Omuko dhorangeye mag mula, kendo oturo lodi mag nyinyo.

¹⁷Joma moko ne tuo nikech richogi. Adier, ne githagore nikech timbegi mamono.

¹⁸Dhogi ne rach, ma ok ginyal chamo gimoro, kendo ne gichiegni tho.

¹⁹To ka ne gin e chandruok kamano, ne giywak ni Nyasaye mondo okonygi, mi oresogi e chandruokgino.

²⁰Ne ooro wachne, mi ochangogi, kendo ne oresogi e tho.

²¹Onego gigo erokamano ni Nyasaye kuom herane mosiko, kendo kuom gik miwuoro mane otimonigi.

²²Onego gigone erokamano gi misengni, kendo giwer wende ma nyiso gik moko duto mosetimo.

²³Joma moko kwang’ e nembe gi yiedhi, kendo giyudo chiembgi e tich nam

²⁴Gineno gik miwuoro ma Nyasaye osetimo e nembe.

²⁵Ne ogolo chik, ahiti maduong’ ochako kudho motago nam.

²⁶Apaka ne gingo yiedhi malo, kendo nyumo kuonde matut. Chuny jokwang’ noridore nikech masira malich mane ojukogino.

²⁷Ne gipuore kendo gitagore ka joma omer. Riekogi duto ne ok nyal konyogi.

²⁸To kane gin e chandruok kamano, ne giywak ni Nyasaye mondo okonygi, mi oresogi.

²⁹Ne okueyo ahiti, mi apaka oling’,

³⁰eka ne gibedo mamor nikech nam nokue. Kamano Nyasaye nokelogi maber nyaka e dhowath mane gidwaro gowoe.

³¹Onego gigo erokamano ni Nyasaye kuom herane mosiko, kendo kuom gik miwuoro mane otimonigi.

³²Onego gihul duong’ne e chokruok mar ogandagi, kendo gipake e buch jodongo.

³³Nyasaye miyo piny ma aora molie doko ongoro, kendo omiyo sokni duono, mi pinje mokiewo kodgi doko motwo.

³⁴Piny momew bende omiyo lokore piny motimo kado ma ok nyal pur.

³⁵To bende omiyo piny motimo ongoro bedo gi pi, kendo piny motwo bedo gi sokni.

³⁶Omiyo joma odenyo dak kuonde makamago, kendo gigero dala mondo gidagie.

³⁷Gikomo, kendo gipidho mzabibu, bende gikeyo maber,

³⁸oguedho joge, komiyo ginya mathoth, kendo ok oyie mondo jambgi odog piny.

³⁹To ka olo jo-Nyasaye, mi osandi, kithiro malit,

⁴⁰to Nyasaye nyiso ni ochayo joma thirogi, komiyo gibayo abaya e thim ka giruenyo.

⁴¹Oreso jochan kuom chandruokgi, kendo omiyo ginya mang’eny.

⁴²Joma kare neno kamano, kendo gibedo mamor, to joricho duto dhogi moko.

⁴³Joma riek onego onon wechegi, mondo opar hera mosiko mar Nyasaye.