Read luo Zaburi 109 Bible Online

Zaburi 109 - luo bible

Zaburi 109

¹A Nyasaye ma apako, kik iling’,

²nimar joricho gi jomriambo josemonja, ka hangona wach.

³Giwacho gik malich kuoma, kendo gibuka, maonge gima omiyo.

⁴Kata obedo ni aherogi kendo alemonigi kamano, to pod gimon amona koda.

⁵Gichula richo kar ber, kendo sin kar hera ma aherogigo.

⁶Giwacho niya, “Mad ng’at mamon kode donjne, kendo ng’at marach ng’adne bura!

⁷Koseyale, to onego oyude gi ketho, kendo mad kwan kata mana lemone ka ketho!

⁸ Hike mondo ong’adre machiek, kendo ng’ato machielo mondo okaw tije.

⁹Nyithinde onego dong’ kiye. Chiege bende onego bed chi liel.

¹⁰Onego nyithinde bed jokuecho mawuotho awuotha, koseriembgi gia e dalagi mokethi.

¹¹Joma osehole gik moko mondo omaye gige duto, kendo joma welo mondo oyak gik moko duto mosekano.

¹²Onego kik ng’ato bedne mang’won, kata kik rit nyithinde modong’ kiye.

¹³Nyikwaye duto mondo otho, mi nyinge lal nono kuom tieng’ mabiro.

¹⁴Onego Nyasaye par richo mag kwerene, kendo tamre weyo ni min mare richone.

¹⁵Pile Nyasaye onego par richo ng’atno, to en owuon onego wich wil kode chuth,

¹⁶nimar ne ok odewo bedo mang’won, to ne osando jodhier gi jochan kod joma ok nyal yudo kaka konyore, mi onego.

¹⁷Ne ohero kuong’o ji, to koro en ema onego numba dong’ne! Guedho ji bende ne ok ohero, omiyo kik ng’ato guedhe!

¹⁸Ne orwakore gi kuong’ ka ng’ama rwako law. Mad en ema kuong’no dong’ kuome mana ka pi ma donjo e okak, kendo leny e chokene mana ka mo!

¹⁹Onego giume mana kaka law umoo ng’ato, kendo oonego gituere kuome ka okanda motueyo pile.”

²⁰To, A Ruoth Nyasaye, mano kaka onego ikum wasika mawacho gik malichgo kuoma!

²¹Ruoth Nyasacha, konya kaka ne isesingori, kendo resa nikech herani maber.

²²Adhier, kendo an jachan. Chunya chandore malit ahinya.

²³Achiegni lal nono ka tipo makadho. Adier, ahungora mana ka yamo mahungo bonyo.

²⁴Chongena onyosore nikech achando chiemo, kendo denda odhero marach

²⁵ Ka ji onena, to gigoyona siboi. Gitwenyo umgi ka gijara.

²⁶Konya, a Ruoth Nyasacha. Resa nokech herani mosiko.

²⁷Yie imi wasikka ng’eyo ni in ema iseresa kamano.

²⁸We gikuong’a akuong’a, to in yie iguedha. Mad lo wasika duto, to an jatichni mondo abed gi mor.

²⁹We wasika wigi okuodi, mi girwak wichkuot ka kandhu.

³⁰Abiro goyo erokamano maduong’ ni Nyasaye, kendo anapake e chokruok maduong’,

³¹nikech okonyo jochan, kendo ogologo e lwet jogo ma ng’adone buch tho.