Read luo Zaburi 113 Bible Online

Zaburi 113 - luo bible

Zaburi 113

¹Pakuru Ruoth Nyasaye! Ee, denduru nyinge, un jotichne.

²Pakuru nyinge pile, kendo nyaka chieng’.

³Chutho, nying Ruoth Nyasaye mondo odendi, chakre wuok chieng’ nyaka podho chieng’.

⁴Ruoth Nyasaye nigi loch kuom ogendini duto, kendo duong’ne maler oyombo polo.

⁵Onge ng’ama chal gi Ruoth Nyasaye ma Nyasachwa. Odak malo kuma bor,

⁶to kata kamano okulore mondo orang polo gi piny.

⁷Ochungo joma odhier a e buru. Adier, ogolo jochan e pidh yugi,

⁸kendo oketogi gibet gi ruodhi mag joge.

⁹Oguedho dhako ma onge nyathi, mi oloke dhako mamor ma min nyithindo. Ruoth Nyasaye mondo opaki.