Read luo Zaburi 118 Bible Online

Zaburi 118 - luo bible

Zaburi 118

¹ Gouru ni Ruoth Nyasaye erokamano, nimar ober, kendo herane osiko mochwere.

²Jo-Israel mondo owach niya, “Herane mosiko ochwere.”

³Jodolo ma nyikwa Harun bende mondo owach niya, “Herane mosiko ochwere.”

⁴Kendo ji duto ma oluore mondo owach niya, “Herane mosiko ochwere.”

⁵Kane an e thagruok, to ne aywak ni Ruoth Nyasaye. Ne odwoka, mi ogonya abedo thuolo.

⁶ Ruoth Nyasaye ni koda, omiyo ok anabed maluor. Ere gima dhano ditimna?

⁷Ang’eyo ni Ruoth Nyasaye ni koda, kendo konya, omiyo anane ka olo wasika.

⁸Geno kuom Ruoth Nyasaye ber moloyo geno kuom dhano.

⁹Adier, geno kuome ber moloyo geno kuom ruodhi mag piny.

¹⁰Ogendini duto ne oketa diere, to ne atiekogi gi teko mar Ruoth Nyasaye!

¹¹Adier, ne giluora koni gi koni, to ne atiekogi gii tekone.

¹²Ne ginur kuoma ka kich, to piyopiyo nono ne girumo ka mach mawang’o kudho!

¹³Ne gimonja marach, kendo ne gichiegni loya, to Ruoth Nyasaye ne okonya.

¹⁴ En ema omiyo abedo maduong’ kendo man gi teko. En e Jawarna.

¹⁵Winjieuru kaka jo-Nyasaye goyo mahu mar loch e hembegi! Teko mar Ruoth Nyasaye osetimo timbe madongo

¹⁶Chutho, tekone e lweny osemiyo walocho.

¹⁷Ok abi tho, to abiro mana bedo mangima, mondo ahul gik ma Ruoth Nyasaye osetimo.

¹⁸Osekuma malich miwuoro, to ok aseweyo atho!

¹⁹Yawnauru dhoranga Hekalu, mondo adonj apak Ruoth Nyasaye!

²⁰Ma e dhoranga Ruoth Nyasaye. Joma kare kende ema donjoe.

²¹A Ruoth Nyasaye, apaki nikech ne iwinjo ywakna, mi imiyo alocho.

²² Kidi mane jogedo odagi, ema koro osedoko kidi motegno moriwo kor ot.

²³Mano en tich Ruoth Nyasaye, kendo en gima lichnwa miwuoro!

²⁴Ruoth Nyasaye osemiyo odiechieng’ni obedo maber ahinya. Wabeduru mamor kendo mail!

²⁵ A Ruoth Nyasaye, wakwayi mondo ikonywa, mondo wadhi nyime maber.

²⁶ Oguedh ng’ama biro e nying Ruoth Nyasaye. Waguedhou gie Hekalu mare.

²⁷Ruoth Nyasaye e Nyasaye, kendo osemiyowa ler. Chakuru timo sawo kuting’o oboke e lwetu, kudhi nyaka e tunge mag kendo-mar-misango.

²⁸In e Nyasacha, kendo abiro goyoni erokamano, bende abiro hulo duong’ni kaka chalo.

²⁹Gouru erokamao ni Ruoth Nyasaye, nikech ober, kendo herane mosiko ochwere.