Read luo Zaburi 124 Bible Online

Zaburi 124 - luo bible

Zaburi 124

¹“Ka dine bed ni Ruoth Nyasaye ok jakorwa, to ang’o ma dine otimorenwa?” (Jo-Israel mondo owach niya:)

²“Ka dine bed ni Ruoth Nyasaye ok jakorwa, e kinde mane wasikwa monjowa,

³to dine gimwonyowa kwangima, ka mirima mager ohewogi kodwa!

⁴Ohula dine oywerowa mabor. Chutho, pi dine oimowa.

⁵Ee, dine wanimo e pi mabubni malich!”

⁶Wapakuru Ruoth Nyasaye, ma ok oseyie mondo wasikwa otiekwa

⁷Wasetony mana ka winyo mobwodho e obadho. Obadho ne otur, kendo koro wan thuolo.

⁸Konyruokwa a mana kuom Ruoth Nyasaye, ma jachuech polo gi piny.