Read luo Zaburi 132 Bible Online

Zaburi 132 - luo bible

Zaburi 132

¹A Ruoth Nyasaye, kik wiyi wil gi Daudi, to parie kaka nothagore malit,

²kendo kaka nosingoreni, in Ruoth Nyasaye Manyalo Gik Moko Duto ma Nyasach Israel

³kowacho niya, “Ok anadhi dala, kendo ok anadhi nindo,

⁴bende ok anayue kendo nindo ok notera,

⁵nyaka chop ayud kar dak ni Ruoth Nyasaye, ma Nyasaye Manyalo Gik Moko Duto kendo ma Nyasach Israel.

⁶ Ne wawinjo ni Sandug Muma ni Efrata, mi ne wayude e paw Jaar.

⁷Eka ne wawacho niya, “Wadhiuru kar dak mar Nyasaye, mondo walem e nyim kom duong’ne.”

⁸A Ruoth Nyasaye, bi idonj kar yueyoni, in kaachiel gi Sandug Muma ma en ranyisi mar tekoni.

⁹Onego jodolo bed joma kare, kendo jogi duto onego ogo mahu gi mor.

¹⁰Ne ihero Daudi jatichni, omiyo kik ilok ng’eyi ni ruoth miseyiero.

¹¹ Ne ikuong’orine matek ahinya, kendo ok nilokri. Ne iwachone niya, “Abiro keto wuodi moro ruoth, kendo enorit piny bang’i.

¹²Ka yawuoti orito singruokna, kendo ka gimako chikena ma abiro miyogi, to yawuotgi bende nobed e kom duong’ni tienge duto.”

¹³Ruoth Nyasaye notim kamano nikech oseyiero Sayun kodwaro ni mondo kar dakne obed kanyo.

¹⁴Nowacho niya, “Kanyo ema nobed kar yueyona nyaka chieng’. Adier, kanyo ema adwaro dakie.

¹⁵Abiro guedho jo-Sayun gi gik moko duto ma gidwaro, bende abiro miyo joge ma jochan chiemo moromogi.

¹⁶Anami jodolo mage bedo joma kare, kendo joge nower, ka goyo mahu gi mor.

¹⁷ Kanyo ema naketie nyakwar Daudi moro ruoth maduong’. Adier, kanyo ema nyikwa ruoth ma aseyiero biro bedoe gi loch.

¹⁸Anami wichkuot ne wasike, to en owuon, lochne nodhi nyime maber.