Read luo Zaburi 135 Bible Online

Zaburi 135 - luo bible

Zaburi 135

¹Pakuru Ruoth Nyasaye! Denduru nyinge un jotichne,

²ma uchung’ e Hekalu mare. Ee, un muchung’ e laru mar od Nyasachwa,

³pakuru Ruoth Nyasaye nikech ober, kendo denduru nyinge gi wer nikech ong’won.

⁴Ne oyiero Jakobo mondo obed ng’ate. Adier, noyiero jo-Israel mondo obed joge owuon.

⁵Ang’eyo ni Ruoth Nyasaye duong’ moloyo nyiseche duto.

⁶Otimo gimoro amora mohero, e polo kata e piny, kendo e nembe koda ka kude matut.

⁷Okelo boche polo morweyo kaa e tung’ piny gi tung’ piny, kendo omiyo polo mil e sa ma koth chue.

⁸Ne onego nyithindo makayo duto mag dhano gi mag le e piny Misri,

⁹kendo ne otimo honni gi gik miwuoro mondo okumgo Farao gi jodonge duto.

¹⁰Ne otieko ogendini mang’eny, kendo onego ruodhi madongo.

¹¹Ne gin Sihon, ruodh jo-Amor, gi Og ruodh Bashan, kod ruodhi duto mag Kanaan.

¹²Piny jogo ne omiyo joge Israel mondo obed mwandugi.

¹³A Ruoth Nyasaye, nyingi nosiki nyaka chieng’, kendo humbi nolagi kuom tienge duto mabiro.

¹⁴Ruoth Nyasaye nong’ad ni joge bura maber, konyiso ni gin kare kendo kong’wononigi.

¹⁵ Nyiseche mag ogendini mamoko to lwet dhano ema oloso gi fedha kod dhahabu.

¹⁶Gin gi dhok to ok ginyal wuoyo, kendo gin gi wang’ to ok ginyal neno.

¹⁷It bende gin go to ok ginyal winjo. Bende gionge gi muya e dhogi.

¹⁸Joma loso kidogo, kaachiel gi joma ogeno kuomgi, chalo mana gi kido ma giselosogo!

¹⁹A Jo-Israel, pakuru Ruoth Nyasaye. Dendeuru, un jodolo ma nyikwa Harun.

²⁰Un jo-Lawi, pakuru Ruoth Nyasaye. Dendeuru un duto muluore!

²¹Pakuru Ruoth Nyasaye Sayun. Ee, dendeuru e dalane Jerusalem. Yaye, pakuru Ruoth Nyasaye!