Read luo Zaburi 136 Bible Online

Zaburi 136 - luo bible

Zaburi 136

¹ Gouru ni Ruoth Nyasaye erokamano, nikech ober, kendo herane mosiko ochwere.

²Gouru erokamano ni Nyasaye maduong’ moloyo nyiseche duto, nimar herane mosiko ochwere.

³Gouru erokamano ni ruoth maduong’ moloyo ruodhi duto. Herane mosiko ochwere.

⁴En kende ema otimo honni madongo. Herane mosiko ochwere.

⁵ Ne ochueyo polo gi riekone. Herane mosiko ochwere.

⁶ Bende ne oyaro piny ewi nam matut. Herane mosiko ochwere.

⁷ Ne ochueyo wang’ chieng gi due,

⁸mondo wang’ chieng’ obed gi loch kuom odiechieng’,

⁹to due gi sulue obed gi loch kuom otieno. Herane mosiko ochwere.

¹⁰ Ruoth Nyasaye nonego yawuot Misri makayo. Herane mosiko ochwere.

¹¹ Ne ogolo jo-Israel e piny Misri. Herane mosiko ochwere.

¹²Adier, nogologi gi lwete motegno kod bade mojing’! Herane mosiko ochwere.

¹³ Ne obaro Nam Makwar. Herane mosiko ochwere.

¹⁴Eka ne otelo ni jo-Israel, mong’ade. Herane mosiko ochwere.

¹⁵Farao gi jolwenje, to nomiyo onimo e nam. Herane mosiko ochwere.

¹⁶Bang’e ne otelo ni joge e thim. Herane mosiko ochwere.

¹⁷Ne onego ruodhi marateke. Herane mosiko ochwere.

¹⁸Adier, ne onego ruodhi marahuma! Herane mosiko ochwere.

¹⁹ Ne gin Sihon ruodh Amor

²⁰ kod Og ruodh Bashan. Herane mosiko ochwere.

²¹Ne okawo pinygi, momiyo joge Israel,

²²mondo obed mwandugi. Herane mosiko ochwere.

²³Kane olowa, to wiye ne ok owil kodwa. Herane mosiko ochwere.

²⁴Chutho, ne ogolowa e teko wasikwa. Herane mosiko ochwere.

²⁵Ochiwo chiemo ni dhano kod le. Herane mosiko ochwere.

²⁶Gouru erokamano ni Nyasach polo, nimar herane mosiko ochwere.