Read luo Zaburi 143 Bible Online

Zaburi 143 - luo bible

Zaburi 143

¹A Ruoth Nyasaye, winj lemona, kendo chik iti ni ywakna. Yie idwoka nikech in ng’ama kare, kendo ma jaadiera.

² Kik iyala, an jatichni, nimar onge ng’ama kare e nyimi.

³Jasika osesanda mi oloya chuth. Oseketa e od tuech molil ti, kendo achalo mana gi joma ne otho chon!

⁴Kuom mano, chunya dwaroo nyosore, nikech oserumo chuth!

⁵Aparo ndalo mosekadho, kaachiel gi gik moko duto misetimo.

⁶Alami ka ating’o bada malo, kendo sisom oloya kodi, mana ka lowo motwo madwaro pi.

⁷Dwoka sani, A Ruoth Nyasaye, nimar genona duto oserumo. Kik ipandna wang’i, nono to abedo e kanyakla mar jogo madhi e piny joma otho.

⁸Nyisa herani mosiko gokinyi, nimar ageno kuomi, yaye Ruoth Nyasaye. Bende nyisa yo monego aluw, niikech kuomi ema aketoe chunya duto.

⁹A Ruoth Nyasaye, aringo iri mondo irita, omiyo resa e lwet wasika.

¹⁰Puonja mondo atim gik mam idwaro, nimar in e Nyasacha. Onego Roho mari bedna mang’won, mi telna e yoo mokue.

¹¹A Ruoth Nyasaye, resa kaka ne isingori. Adier, konya e chandruokna kuom ng’wononi.

¹²Neg wasika, nikech hera miherago, kendo tiek jogo duto mathira, nikech an jatichni.