Read luo Zaburi 145 Bible Online

Zaburi 145 - luo bible

Zaburi 145

¹Anahul duong’ni maler, A Ruodha kendo Nyasacha, kendo anapak nyingi ndalo duto nyaka chieng’.

²Abiro goyoni erokamano odiechieng’ kodiechieng,, kendo anapaki ndalo duto mochwere.

³A Ruoth Nyasaye iduong’, omiyo nyaka paki ahinya. Adier, duong’ni odhiero ji ng’eyo.

⁴Gima isetimo tienge gi tienge nopaki, ka gihulo timbeni madongo.

⁵Ji nowuo kuom duong’ni maler kod tekoni. An bende napar matut timbeni miwuoro.

⁶Ji nowuo kuom timbeni malich. An bende nahul duongni maler.

⁷Giniol gik moko duto mabeyo misetimo, kendo ginipaki kuom timni makare, ka giwer mamor.

⁸Ruoth Nyasaye jang’wono, kendo okecho ji. Iye ok wang’ piyo, kendo ohero ji gi hera mosiko.

⁹Otimo maber ni ji duto, kendo okecho gik moko duto mane ochueyo.

¹⁰Kuom mano, A Ruoth Nyasaye, chuechni duto biro paki, kendo jogi biro goyoni erokamano.

¹¹Ginitwag kuom duong’ maler mar lochni, kendo gininyis kaka tekoni ng’ongo,

¹²mondo ji duto ong’e timbeni madongo, kod duong’ maler mar lochni.

¹³Lochni en loch mochwere. In e Ruoth nyaka chieng’. Ruoth Nyasaye ochopo singruokne duto, kendo timbene duto beyo.

¹⁴Okonyo ji duto manie chandruok, kendo oting’o joma obolore malo.

¹⁵En ema gik moko duto mangima range, kendo omiyogi chiemo e sa ma kech ohewogi.

¹⁶Oyawo lwete, kendo omiyogi gik moko duto ma gichando.

¹⁷Yore duto mag Ruoth Nyasaye gin kare. Adier, ong’won e timbene duto

¹⁸Ochiegni gi ji duto ma ywakne gi adiera.

¹⁹Ji duto ma oluore, omiyo gik moko duto ma gichando, bende owinjo ywakgi, kendo oresogi.

²⁰Orito ji duto mohere, to enotiek joricho duto.

²¹An to, pile anapak Ruoth Nyasaye. Chuechne duto bende mondo opak nyinge maler nyaka chieng’.