Read luo Zaburi 146 Bible Online

Zaburi 146 - luo bible

Zaburi 146

¹Pakuru Ruoth Nyasaye! A yaye chunya, dend Ruoth Nyasaye.

²Anapake kuom ngimana duto. Ee, anadend Nyasacha gi wer ndalona duto.

³Kik ugen kuom jotelo mag piny, kata kuom ng’ato ang’ata ma ok nyal warou,

⁴nikech ka githo, to gidok e lowo, kendo chieng’ onogo gik moko duto mane gichano timo, orumo!

⁵To ng’at ma Nyasach Jakobo konyo, kendo ma ogeno kuom Ruoth Nyasache,

⁶ ma jachuech polo gi piny kod nam, kaachiel kod gik moko duto manie igi, en jahawi. Ruoth Nyasaye pile rito singruokne.

⁷Ong’ado bura, kochwako joma ithiro, kendo ochiwo chiemo ni joma denyo. Ruoth Nyasaye gonyo joma otue bedo thuolo,

⁸kendo omiyo muofni neno. Oting’o joma obolore malo, kendo ohero joma kare.

⁹Orito jopinje mamoko modak e piny joge, bende okonyo mond liete gi nyithi kiye, to orocho gik ma joricho ochano timo!

¹⁰Ruoth Nyasaye nobed ruoth nyaka chieng’. A Sayun, Nyasachi nobed gi loch mochwere. Pakuru Ruoth Nyasaye!