Read luo Zaburi 147 Bible Online

Zaburi 147 - luo bible

Zaburi 147

¹Pakuru Ruoth Nyasaye! En gima ber, wero ni Nyasachwa wende pak. Adier, goyone erokamano long’o kendo owinjore.

²Ruoth Nyasaye chako gero jerusalem kendo. Oduogo jo-Israel mane oter e tuech,

³bende oduogo chuny joma genogi oserumo, kendo othiedho adhondegi.

⁴Osekwano sulue, mi okeyo kar rombgi, kendo oluongo moro ka moro gi nyinge.

⁵Ruoth Nyasaye duong’ miwuoro, bende riekone lach mokadho apima.

⁶Oting’o joma obolore malo, joricho to ochwado piny e lowo.

⁷Weruru ni Nyasachwa wende pak, kugoyone thum mamit.

⁸Oyaro boche polo e kor polo, kendo okelo koth e piny, lum bende omiyo loth e gode.

⁹Ochiwo ni le chiembgi, kendo omiyo nyithi agak chiemo ka giywakne.

¹⁰Teko mar farese kata teko mar jolweny, ok ema mi Nyasaye mor,

¹¹to obedo mamor mana gi joma oluore kendo man gi geno kuom herane mosiko.

¹²Weruru ni Ruoth Nyasaye, un jo-Jerusalem. A yaye, jo-Sayun, pakuru Nyasachu.

¹³Oseketo lodi motegno e dhorangeyeu, kendo oseguedho jou.

¹⁴Osekelo kue e tong’ pinyu, kendo osemiyou cham mabeyo mogundho.

¹⁵Ogolo chik ni tung’ piny gi tung’ piny, kendo wachne chopo piyo ka diemo wang’.

¹⁶Okelo pe mopedhore ka pamba, kendo okiro tho mamoko e lum mana ka buru.

¹⁷Ooro kite mag pe mana ka kit ombo, bende okelo koyo, mi pi lokre pe.

¹⁸Bang’e ogolo chik, kendo pe leny nono. Bende okelo yamo, kendo pi chako mol.

¹⁹Onyiso nyikwa Jakobo wachne. Ee, ogolo chikene gi buchene ni jo-Israel.

²⁰Onge oganda moro machielo ma osetimone kamano, kata ma osepuonjo chikene. Pakuru Ruoth Nyasaye!