Read luo Zaburi 148 Bible Online

Zaburi 148 - luo bible

Zaburi 148

¹Pakuru Ruoth Nyasaye! Ee, dendeuru gie polo.

²Un malaikane, kaachiel gi ogend lweny duto mage mae polo, pakeuru!

³Pakeuru un wang’chieng’ gi due, koda ka un, sulue marieny duto.

⁴Un polo man malo chutho, dendeuru, kaachiel gi un, pige man ewi polo.

⁵Giduto mondo gipak nying Ruoth Nyasaye, nikech en ema ne ogolo chik, mi ochuegi.

⁶Ne ogurogi kuonde ma gintie nyaka chieng’, kuom chikne mochwere.

⁷Pakuru Ruoth Nyasaye gie piny, un ondiegi mae nam, kod nembe matut duto,

⁸koda ka mach gi pe, kod pi malokore pe, kaachiel gi yamo madongo marito chikne.

⁹Dendeuru un gode madongo gi matindo, kod yiend olembe gii bunge,

¹⁰kaachiel gi le mae thim kod jamni gi gik mamol, kod gik mahuyo.

¹¹Un ruodhi gi jotelo duto mag piny, kod jodongo gi jong’ad bura ma e piny duto,

¹²kaachiel gi yawuowi gi nyiri, koda ka joma oti gi joma tindo, pakeuru!

¹³Giduto mondo gipak Ruoth Nyasaye, nimar nyinge duong’ moloyo nying moko duto, kendo duong’ne maler oyombo polo gi piny.

¹⁴Nomiyo ogandane ma jo-Israel odoko motegno, ni mondo joge mohero ahinya opake. Pakuru Ruoth Nyasaye!