Read luo Zaburi 18 Bible Online

Zaburi 18 - luo bible

Zaburi 18

¹A Ruoth Nyasaye, aheri ahinya! In e jaritna In e tekona, kendo in e jakonyna.

²Nyasacha, in e jaresna, kendo lwandana ma ageng’orae. In e okumbana, gi teko mar resruokna, kendo in e ohingana.

³Akwayo Nyasaye mowinjore yud pak, kendo oresa kuom wasika.

⁴Tonde mag tho ne orida matek, kendo masich tho notaga ka apaka.

⁵Liel ne dwaro maka ka obadho. Adier, tho ne odhoga ka gogo.

⁶Kane anie chandruok, ne akwayo Ruoth Nyasaye. Naywak ni Nyasacha mondo okonya, mi owinjo dwonda gie Hekalu mare, ka ywakna ochopo e ite.

⁷Piny notetni kendo oyiengni. Mise mag gode bende notetni kendo okirni nikech mirimb Nyasaye.

⁸Iro nodum kawuok e ume, kendo mach mang’ang’ni nowuok e dhoge.

⁹Nosudo polo machiegni, eka olor, konyono rumbi molil ti.

¹⁰Ne oidho kerubi mi ohuyogo matek e kor yamo.

¹¹Ne oimore e mudho mandiwa, kendo ne okawo rumbi mar koth moloko ka hembe.

¹²Pe kod mirni motimo mach nowuok e ler mane omorore e nyime, ka mwomo rumbi molil.

¹³Dwond Ruoth Nyasaye nomor! Ee, Ng’ama Duong’ Moloyo nomor gie polo!

¹⁴Nodiro mil polo ka aserni kokworogi koni gi koni.

¹⁵Kane Ruoth Nyasaye okudho ka yamb nyakoyi, kendo okwero wasike, to mise mag piny noelore, kendo kude mag nam nofwenyore.

¹⁶Orieyo bade ka en malo, mi omaka, kogola e ataro ngala.

¹⁷Ne oresa e lwet wasika marateke, kendo kuom ji duto mosin koda mane oloya gi teko.

¹⁸Ne gimonja ka anie masira, to Ruoth Nyasaye ema ne okonya.

¹⁹Ne ogola e chandruok, mi abedo thuolo. Noresa nikech nomor koda.

²⁰Ruoth Nyasaye ne opoga pok mowinjore gi timna makare. Ne ochula mowinjore gi tichna maler,

²¹nikechh naluwo yorene, kendo ok asepogora gi Nyasacha, ka adonjo e richo

²²aserito chikene duto, ma onge kata achiel ma aseketho.

²³Aonge gi ketho e nyim Ruoth Nyasaye, kendo aseritora kuom richo.

²⁴Omiyo osemiya pok mowinjore gi timna makare, nikech ong’eyo ni aonge gi ketho.

²⁵In Ruoth Nyasaye in jaadiera ni joma ohero adiera, kendo ilong’o ni joma long’o.

²⁶Iler ni joma ler, to wiyi tek ni joma wigi tek.

²⁷Ireso joma muol, to josunga idwoko piny.

²⁸A Ruoth Nyasacha, in ema imiya ler, kendo imenyona mudho.

²⁹Imiyo aloyo oganda lweny momonja, kendo in e Nyasacha ma konya kalo ohinga.

³⁰Yor Nyasaye en yo malong’o. Osenon wach Ruoth Nyasaye, moyud ni en adier. Ruoth Nyasaye e okumba mar joma ogeno kuome.

³¹Ere nyasaye moro mak mana Ruoth Nyasachwa? Koso ere lwanda moro mak mana Nyasachwa?

³²En e Nyasaye mamiyo abedo motegno, kendo mamiyo yorena bedo moboch.

³³ En ema omiyo tienda bedo mayot ka tiend mwanda, kendo orita gi kue e gode.

³⁴Ojiwo bada ni lweny, omiyo anyalo ywayo kata mana atung’ mar mula.

³⁵In Ruoth Nyasaye isekelona resruok mobedona okumba, kendo lweti ma kor achwich osetega. Konyni bende osemiyo abedo gi duong’.

³⁶Nimiya yo malach mondo awuothie, mi ne ok akier.

³⁷Ne alawo wasika, mi ajuko, kendo ne ok aduogo ka pok girumo.

³⁸Ne agoyogi ngonga ma ok ginyal chung’. Ne giriere e tienda ka aloyogi.

³⁹Ne imiya teko mar kedo, kendo mar loyo wasika.

⁴⁰Ne imiyo wasika oringa, mi atiekogi.

⁴¹Ne giywak ni mondo okonygi, to onge ng’ama ne nyalo resogi. Ne giywak ni Ruoth Nyasaye to ne ok odwokogi.

⁴²Ne aregogi mayom mana ka buru ma yamo tero, mi anyonogi ka chuodho.

⁴³Ne iresa kuom joma piem koda, kendo ne iketa jatelo mar ogendini. Ji mane pok ang’eyo nolokore joga.

⁴⁴Kane giwinjo humba, to ne giyie lochna mana gikanyono. Ji moa e pinje mamoko ne biro ira kobolore.

⁴⁵Chunygi nool, mi ne giwuok ka gitetni kuma ne oyudo gipondoe.

⁴⁶Ruoth Nyasaye nitie. En e lwandana. Pakeuru! Nying Nyasaye ma jawarna mondo opwo!

⁴⁷En e Nyasaye mane omiya teko mar chulo kuor, koketo ogendini e bwo lochna,

⁴⁸kendo koresa kuom wasika. En e ruoth Nyasaye mane omiyo aloyo joma ne piem koda, kendo mane ogola kuom jomahundu.

⁴⁹ Kuom mano anapake e kind ogendini. Adier, anapak nyinge gi wer.

⁵⁰Nyasaye kelo resruok maduong’ ni ruoth moketo. Ee, ohero ng’at moyiero gi hera mosiko, ma en Daudi gi kothe nyaka chieng’.