Read luo Zaburi 22 Bible Online

Zaburi 22 - luo bible

Zaburi 22

¹ Yaye Nyasacha, Nyasacha, iweya nang’o? Aseywak malit mondo ayud kony, to ok anyal yudo.

²A Nyasacha, aywakni godiechieng’ to ok idwoka. Gotieno bende aywak to ok ayud kue.

³To in e Ng’ama Ler momi duong’. In ema jo-Israel paki.

⁴Kwerewa ne oketo geno margi kumi, mi iwarogi.

⁵Ne giywakni, mi iresogi e masira. Omiyo, geno mane gigenogo kuomi ne ok okelonigi wichkuot.

⁶An to koro ok an dhano, to an mana kudni ma ji duto chayo kendo jaro.

⁷ Ji duto monena nyiera. Gitwenyona umgi, kendo gigoyona siboyi.

⁸ Giwacho kuoma niya, “Ne ogeno kuom Ruoth Nyasaye, to koro dak orese? Chutho, ka ohere, to dak okonye?”

⁹To yaye Ruoth Nyasaye, in ema ne igola e ich, kendo ka ne pod atin, to in ema ne irita.

¹⁰In ema asebedo ka apadora kuomi nyaka ne nywola. Ee, isebedo Nyasacha chakre tinna.

¹¹Kik ibed mabor koda nikech chandruok chiegni juka, to onge ng’ama dikonya.

¹²Wasigu mang’eny, olwora ka ruedhi. Giduto gigoyona ageng’a mana ka ruedhi makwiny mag Bashan.

¹³Ging’amona dhogi ka sibuoche ma ruto, ka dwaro kidha.

¹⁴Tekra orumo ka bend dak. Chokena duto orokni, kendo chunya leny mana ka odok.

¹⁵Tekra oduono motwo ka balatago, kendo lewa omoko e danda. Iseweya e buru ka ng’ama otho.

¹⁶Joma richo oselwora, mana ka guogi moketa diere ka dwaro kaya. Gikidho lwetena gi tiendena.

¹⁷Chokena duto neno, kendo wasika duto ranga ka nyiera.

¹⁸ Gipogore lepa e kindgi, kendo gigoyo ombulu mondo ging’ego ng’ama dikaw kandhuna.

¹⁹Kik ibed mabor koda, A Ruoth Nyasaye! Reti mondo ikonya, yaye Jawarna.

²⁰Resa mondo kik ligangla nega. Adier, res ngimana kuom guogigo kendo kuom sibuochego. Bende resa kuom ruedhi makinygo.

²² Anahul nyingi ni owetena. Anapaki gi wer a dier chokruokgi.

²³Un jotich Ruoth Nyasaye, pakeuru! Miyeuru duong’, un nyikwa Jakobo. Ee, un jo-Isarel duto, lameuru,

²⁴nimar ok ojwang’ jochan, bende ok opand wang’e ni chandruokgi. Ok obolrenigi gi chien, to okonyogi ka gikwaye.

²⁵Abiro paki e chokruok maduong’ kuom gima isetimo, kendo abiro timo misengni e nyim joma oluori ka achopogo singruok mane atimo.

²⁶Joma odhier nochiem achiema mi yieng’, kendo jogo madwaro Ruoth Nyasaye biro pake. Mad gidhi nyime maber nyaka chieng’!

²⁷Ogendini duto nopar Ruoth Nyasaye. Ginidhi ire ka gia e tung’ piny gi tung’ piny. Adier, ogendini duto nolame.

²⁸Ruoth Nyasaye e ruodh piny, kendo ogendini duto ni e bwo lochne.

²⁹Josunga duto nokulrene. Chutho, ji duto matho nokulre e nyime.

³⁰Tienge mabiro noti ni Ruoth Nyasaye, kendo nonyis ogendini mabiro wachne

³¹Ji ma pok minegi onywolo bende nowachnigi niya, “Ruoth Nyasaye osewaro joge.”