Read luo Zaburi 27 Bible Online

Zaburi 27 - luo bible

Zaburi 27

¹Ruoth Nyasaye e lerna kendo e warruokna, omiyo ere ng’ama daluor? Ruoth Nyasaye e kar konyruokna, omiyo ok daluor ng’ato.

²Ka joma richo ma mon koda omonja mondo otieka, to gin ema gichwanyore kendo gipodho.

³Kata ka oganda lweny maduong’ ema obiro mondo omonja, to ok dabed maluor, kendo kata ka an e lweny mager, to pod ageno mana kuom Nyasaye.

⁴Asekwayo Ruoth Nyasaye gimoro achiel kende, kendo mano ema adwaro moloyo; adwaro dak e ode kuom ngimana duto, mondo ane ber mare kendo alame e Hekalu mare.

⁵E kinde mar chandruok to enopanda e ode. Ee, enokana maber e Hekalune, mi oketa ewi lwanda mabor mondo akwo.

⁶Kamano analo wasigu molwora koni gi koni. Anachiw misengni e Hekalu gi mor, kendo anapak Ruoth Nyasaye gi wer.

⁷A Ruoth Nyasaye, winja ka aluongi, kendo bedna mang’won mondo idwoka.

⁸Ne iwacho niya, “Biuru ira.” Omiyo abiro iri, A Ruoth Nyasaye,

⁹to kik ipandna wang’i! Kik ikech koda, kendo kik iriemba an jatichni. A Nyasaye Jawarna, in ema isebedo konyruokna, omiyo kik iweya kata kik ijwang’a.

¹⁰Kata kapo ni wuora gi mama ojwang’a, to in Ruoth Nyasaye, ibiro rita.

¹¹A Ruoth Nyasaye, pwonja gima idwaro mondo atim, kendo telna mondo aluw yo maber mondo atony nikech wasigu obutona.

¹²Kik ijwang’a e lwet wasika ma monja gi weche mag miriambo, kendo ma bwoga.

¹³Ang’eyo ni abiro neno ng’wono ma Nyasaye timo ni joge kapok atho.

¹⁴Genuru kuom Ruoth Nyasaye. Ee, genuru kuome, kendo kik chunyu nyosre.