Read luo Zaburi 30 Bible Online

Zaburi 30 - luo bible

Zaburi 30

¹A Ruoth Nyasaye, adendi nikech isewara, kendo ok iseyie mondo wasika ogona siboi.

²Ne aywakni mondo ikonya, A Ruoth Nyasaye, mi ichanga.

³Ne igola e piny joma otho. Ne an e kanyakla mar joma dhi e piny matutno, to kata kamano ne iresa.

⁴Pakuru Ruoth Nyasaye gi wer, un joge maler. Parieuru gik ma Ng’ama Ler osetimo, kendo goneuru erokamano!

⁵Mirimbe rumo piyopiyo, to ng’wonone osiko mochwere. Kamoro inyalo bedo gi kuyo gotieno, to kochopo okinyi, to iyudo mor.

⁶Ne awinjo ka adhi maber, mi awacho e chunya niya, “Onge gima diloya.”

⁷A Ruoth Nyasaye, in ibedona mang’won, kendo iserita mana ka ng’ama odak kama ochiel motegno e got. To kane ipandona wang’i, luoro ne omaka ahinya.

⁸Ne aluongi, ka akwayi mondo ikonya, A Ruoth Nyasaye.

⁹Ere ber ma thona biro kelo? Koso ohala ma ibiro yudo ka adhi e bur, to ere? Bende ng’ama otho nyalo paki adier, kata hulo berni mochwere?

¹⁰A Ruoth Nyasaye winja, kendo bedna mang’won! Konya, A Ruoth Nyasaye!

¹¹Iseloko kuyo mane an go odoko ilo, bende iselonyo lepa mag ywak, mi imiya lewni mag mor.

¹²Kuom mano, ok abi ling’, to abiro paki gi wer. A Ruoth Nyasaye, in e Nyasacha, omiyo abiro goyoni erokamano nyaka chieng’.