Read luo Zaburi 35 Bible Online

Zaburi 35 - luo bible

Zaburi 35

¹A Ruoth Nyasaye, kwed joma kedo piem koda, kendo ked gi jogo ma kedo koda.

²Kaw kuot kod gigi mag lweny mondo ibi iresa.

³Ikri gi le kod tong’ mondo ikedgo gi joma lawa. A Nyasaye, nyisa ni in e Jawarna! Mad lo joma dwaro nega, mi wigi kuodi,

⁴kendo mad jogo ma chano timona gik maricho dwok chien, mi ng’eng nono.

⁵Malaika mar Ruoth Nyasaye mondo oriembgi, mi gike ka mihudhi ma yamo tero.

⁶Mad yo ma giluwo bed motimo mudho kendo makier e sa ma malaika mar Ruoth Nyasaye negogi!

⁷Ne gichikona obadho kayiem nono. Adier, ne gikunyo bur matut mondo anyumrae.

⁸To masira biro jukogi ka ok ging’eyo. Gibiro moko e obathgi giwegi, kendo gin ema gibiro nyumore e bur mane gikunyo.

⁹Bang’e anabed mamor nikech gima Ruoth Nyasaye osetimo. Ee, abiro bedo mail nikech ne oresa.

¹⁰Omiyo abiro wacho ni Ruoth Nyasaye gi chunya duto niya, “Onge ng’at moro machal kodi! Ireso joma nyap kuom joma rateke, bende ikonyo jochan kuom joma thirogi.”

¹¹Joricho bedo joneno mag miriambo kuoma, kendo gidonjona kuom ketho ma ok ang’eyo.

¹²Kata obedo ni asetimonigi maber, to gin gitimona mana marach. Kuom mano chunya okuyo malit.

¹³An to, kane gituo, to ne arwako pien gugru. Nasando denda ka ariyo kech, kendo ne alemo ka akulo wiya piny,

¹⁴mana kaka dalem ni osiepna kata owadwa. Kamoro amora mane adhiye, ne akuyo mana ka ng’ama ywago min mare.

¹⁵To kane an e chandruok, ne gimor giduto. Ne gichokore, mi gilwora ka ginyiera. Ji ma ok ong’eya ne goya, kendo ne gisiko girodha arodha.

¹⁶Ne gisanda ka gigoyona siboi, kendo ka ging’iya gi wang’ marach.

¹⁷A Ruoth Nyasaye, pod ibiro ranga aranga nyaka karang’o? Konya e lwet wasikago mondo kik hinya. Adier, resa kuom sibuochegi!

¹⁸Bang’e anagoni erokamano e chokruok maduong’. Ee, anapaki e nyim oganda mang’ongo.

¹⁹ Kik iwe loya, mi wasika ma jomiriambogo gona siboi, bende kik iwe joma mon koda kayiem bed mamor nikech chandruok ma an go.

²⁰Wechegi ok gin weche makelo kue, to gihango weche ma yoreyore kuom ji duto mohero kue.

²¹Gidonjona ka gikok niya, “Ne waneno gik mane itimo!”

²²To in Ruoth Nyasaye, isewinjo gima giwachono. Emomiyo kik iling’, kendo kik ibed mabor koda.

²³A Ruoth Nyasaye, a malo mondo ikonya. Bi mondo ichwaka, yaye Nyasacha.

²⁴In jaadiera, a Ruoth Nyasaye, omiyo ng’ad bura manyiso ni aonge gi ketho. A Nyasacha, kik iwe wasika gona siboi,

²⁵Kendo kik iwe giwach kendgi niya, “Mano ber! Otimore mana kaka ne wadwaro!” Bende kik iwe giwach niya, “Waseloye.”

²⁶Mad lo joma goyona siboi ka an e chandruok, mi ng’eng nono. Onego wichkuot maduong’ mak jogo ma paro ni beyo moloya.

²⁷To joma mor ni aloyo bura, onego kog gi ilo ka giwacho ding’eny niya, “Ruoth Nyasaye duong’ miwuoro, kendo omor ka jatichne dhi nyime maber.”

²⁸Kamano, anahul timni makare, A Nyasaye, kendo anapaki pile odiechieng’ duto.