Read luo Zaburi 38 Bible Online

Zaburi 38 - luo bible

Zaburi 38

¹A Ruoth Nyasaye, kik ikwera kikecho, kendo kik ikuma gi mirima.

²Isebaya gi asere mi ichwowa, kendo lweti odiya piny.

³Atuo malich nikech mirimbi. Denda duto tuo ogoyo nikech richona.

⁴Achako nyumora e ataro mar richona. Pek mar richona ohewa ting’o.

⁵Adhondena top kendo ng’ue, nikech gik mofuwo masetimo.

⁶Tuono odola, kendo otieka chuth. Odiechieng’ duto, achalo ng’ama ywago ng’at motho.

⁷Denda duto wang’a ka mach, kendo onge kamoro e denda ma ok rama.

⁸Anyosora kendo denda duto oriemo marach. Chunya chandore, kendo achur malit.

⁹A Ruoth Nyasaye, ing’eyo gima adwaro, kendo churna bende ok okia.

¹⁰Adundona guecho, kendo tekra orumo. Mor mar wang’a bende oselal.

¹¹Osiepena gi jogweng’wa ok nyal sudo buta nikech adhondena. Kata mana joodwa bende obet mabor koda.

¹²Joma dwaro nega chikona obadho, kendo jogo ma dwaro hinya bwoga gi weche maricho. Odiechieng’ duto gihangona wach mondo gihinya.

¹³To achalo ng’at ma ite odino ma ok winj wach, kendo ka momo ma ok nyal wuoyo.

¹⁴Adier, achalo ng’at ma ok nyal kwero wach, mana ka gima ita odino.

¹⁵A Ruoth Nyasaye, in ema ageno kuomi, kendo in ema inidwoka.

¹⁶Kik iwe wasika gona siboi kuom chandruok ma an goni, bende kik iwe gichamna nyadhi ka achwanyora mi apodho.

¹⁷Adier, achiegni podho, kendo rem osiko koda.

¹⁸Ahulo richona, kendo ka aparogi, to kibaji ema goya.

¹⁹Wasika to dendgi beyo kendo gin rateke. Ji mang’eny mon koda kayiem nono.

²⁰Joma chulo rach kar ber mon koda nikech atimo gik makare

²¹A Ruoth Nyasaye, kik ijwang’a, kendo kik ibed mabor koda, yaye Nyasacha.

²²A Ruoth Nyasacha ma jawarna, reti mondo ikonya!