Read luo Zaburi 4 Bible Online

Zaburi 4 - luo bible

Zaburi 4

¹A Nyasaye ma jaritna, yie idwoka ka aluongi, kane anie thagruok, to in ema ne ikonya. Koro chak ikecha, kendo iwinj ywakna!

²Un ji ubiro yanya nyaka karang’o kuhero mana gik manono, kendo kuluwo yore mag miriambo?

³Ng’euru nii Ruoth Nyasaye oseyiera mondo abed mare owuon, kendo ka aluonge to owinja.

⁴ Kata ka mirima omakou machal nadi, to kik utim richo. Paruru matut ahinya kuom wachno, ka un kendu mos e uteu.

⁵Timuru ni Nyasaye misengni mowinjore, kendo keturuu geno maru kuome.

⁶Ji mang’eny wacho niya, “Mano kaka wagombo yudo gueth! A Nyasaye, ting’ wang’i mondo irangwa gi ng’wononi!”

⁷Mor ma imiya duong’ moloyo ma joma nigi cham kod divai mang’eny nigo.

⁸Sa asaya ma arierae piny, to nindo tera mos: A Nyasaye, in kende ema irita maber, omiyo adaak gi kue.