Read luo Zaburi 42 Bible Online

Zaburi 42 - luo bible

Zaburi 42

¹Kaka le gamo yueyo ka dwaro pi aora, e kaka chunya dwari, yaye Nyasaye!

²A Nyasaye mangima, siso oloya kodi. Dayud thuolo karang’o mondo alem e nyimi?

³Aywak odiechieng gotieno kendo pi wang’a kende e chiemba, nimar seche duto wasika penja niya, “Nyasachi nogo ni kanye?”

⁴Ka aparo gik mosekadho, to chunya chot, nimar aparo kaka ne atelo ni ji rumbi kane wadhi e od Nyasaye, kendo kaka oganda mamor ne wer, kendo pako Nyasaye matek.

⁵Ere gima omiyo chunya lit? Koso ang’o momiyo chunya parore? Anaket genona kuom Nyasaye, mi anachak apake kendo. En e jakonyna kendo Nyasacha.

⁶Chunya lit, oomiyo anapare. Ee, kata obedo ni adar, mi adak kuma aora Jordan ochakoree but got Hermon kod got Miza, to pod anapare kuno.

⁷Nam ka nam luongo wadgi, ka abururu mag Nyasaye wuo, kendo anyumora e apaka maggi madongo.

⁸Ruoth Nyasaye nyiso herane mosiko odiechieng’ kodiechieng’. Anawerne wende pak otieno kotieno. Ee, analam Nyasaye ma miya ngima.

⁹Abiro wacho ni Nyasaye ma lwandana niya, “Wiyi osewil koda nang’o? Ere gima omiyo onego abed mana ka akuyo nikech wasika?”

¹⁰Gigoyona siboi, kendo ginyiera, ka athagora. Odiechieng’ duto gipenja niya, “Nyasachi nogo ni kanye?”

¹¹Ere gima omiyo chunya lit? Koso ang’o momiyo chunya parore? Anaket genona kuom Nyasaye, mi anachak apake kendo. Ene jakonyna, kendo Nyasacha.