Read luo Zaburi 51 Bible Online

Zaburi 51 - luo bible

Zaburi 51

¹A Nyasaye, kecha nikech herani mosiko! Ywe richona duto kuom ng’wononi maduong’.

²Lwok timbena mamono, kendo pwodha kuom richona.

³Ayie ni timbena mono, kendo gichando chunya seche duto.

⁴ In kendi ema asekethoni, ka atimo gik ma ok ler e nyimi. Kuom mano, ayie ni in kare kiyala, kendo ka ing’adona bura.

⁵Asebedo katimo richo chakre ndalo mane onywolae. Adier, nyaka chieng’ mane mama omakoe ichna, asebedo jaricho.

⁶To chuny man gi adiera ema idwaro, omiyo pong’ parona gi riekoni.

⁷Golna richona, eka abed maler, kendo lwoka mondo abed matar moloyo pe.

⁸We mondo ayud mor maduong’. Kata obedo ni isegoya, mi itura kamano, to anachak abed mamor kendo

⁹Geng’ wang’i ni richona, kendo lwok timbena mamono duto.

¹⁰A Nyasaye, chuena chuny manyien, kendo miya paro malong’o mopong’ gi luor.

¹¹Kik iriemba e wang’i, bende kik imaya Roho mari maler.

¹²Duogna mor mane an-go kane iwara, kendo mi chunya obed gi luor.

¹³Eka anapuonj joricho chikeni, mi giniduog iri.

¹⁴A Nyasaye ma jawarna, kik iwe atho nikech richona, eka abiro pako timbeni makare gi dwol maduong,

¹⁵Yaw dhoga mondo awuo, to abiro paki.

¹⁶Ka da bed ni idwaro misengni, to da achiwoni. To ok iyie kata mana gi misengni miwang’o pep.

¹⁷A Nyasayee, misango midwaro en chuny mobolore, nikech ok nidagi chuny motur kendo mojok gi richo.

¹⁸Bed mang’won ni dala mar sayun, A Nyasaye, kendo konye. Ee, chak iger ohinga mar Jerusalem.

¹⁹Eka inibed mamor gi misengni motimni kaka chik dwaro, kendo ruedhi nochiw ka misengni e kendoni mar misango.