Read luo Zaburi 55 Bible Online

Zaburi 55 - luo bible

Zaburi 55

¹A Nyasaye, winj lemona, kendo kik ipandna wang’i ka aywakni,

²to yie iwinja, kendo idwoka. Aonge gi kue nikech thagruok ma an-go.

³Chunya chandore nikech bwok ma wasika bwogago, kod thir ma wasika thirago. Gimiya chandruok mathoth, kendo giyanya ka gikecho.

⁴Luoro ohewa, kendo masiche mag tho ohinga.

⁵Kihondko omaka, kendo atetni. Ee, masiche opong’o chunya.

⁶Da abed gi bwomba ka akuru, to da ahuyo, mi adhi mabor mondo ayud kue!

⁷Adier, da ahuyo mi adhi mabor ahinya, kendo da agero dalana e thim.

⁸Da areto, mondo ayud kama abwokie, mondo yamo mager gi koth morweyo kik hinya.

⁹A Ruoth, tiekgi kendo roch wechegi, nikech lweny kod timbe mag mahundu ema aneno e dala.

¹⁰Giidho ewi ohinga mar dala, ka giwuotho e wiye alwora odiechieng’ gotieno, kendo dala opong’ gi timbe mamono gi anjawo.

¹¹Masira ni kuonde duto, bende yore mag dala opong’ gi weche maricho kod wuondruok.

¹²Ka da bed ni jasigu ema jara, to da adhil adhila. Kata ka da bed ni ng’at mapiem koda ema sungorena to da apondone.

¹³To kara odoko mana ni in, ng’at mwaromgo, ma jawuodha kendo ma osiepna mahero.

¹⁴Ne wagoyo kodi mbaka mamit, kendo ne wadhi kodi e Hekalu kaachiel gi oganda mane ochokore.

¹⁵Onego wasika yud tho apoya, mi gidhi e piny joma otho ka pod gingima! Richo opong’o miechgi kod chunygi.

¹⁶To an akwayo Ruoth Nyasaye mondo okonya, kendo ang’eyo ni obiro resa.

¹⁷Aywak kendo achur okinyi gi odiechieng’ kod otieno, kendo ang’eyo ni obiro winjo ywakna.

¹⁸Kata obedo ni wasika thoth kamano, to Nyasaye biro dwoga kangima kaa e lweny ma akedoe kodgi.

¹⁹Nyasaye ma osebedo Ruoth nyaka nene biro winja kendo biro loyogi. To gin, onge gima ginyalo timo, nikech ok giluore.

²⁰Jowuodha machon ne omonjo osiepene, moketho singruokne kodgi.

²¹En jambola, to chunye opong’ gi sigu. Adier, wechene yom ka mo, to kara gibitho mana ka ligangla mowuodhi e olalo!

²²Ket chandruokni ni Ruoth Nyasaye, to obiro konyi. Ok nowe mondo olo ng’at maber.

²³Jonek gi jomriambo ok nodag aming’a. In Nyasaye ibiro wito jogo e bur matut. An to abiro geno kuomi.