Read luo Zaburi 58 Bible Online

Zaburi 58 - luo bible

Zaburi 58

¹Un ruodhi marateke, bende uyalo ji maber, ka ung’ado bura kare e kind ng’ato gi wadgi?

²Ooyo, ok utim kamano, to uparo mana richo ma udwaro timo, kendo utimo timbe mahundu e piny.

³Joricho timbegi obam e ngimagi duto. Giwacho miriambo, chakre chieng’ monywolgie.

⁴Gitimo kwiri mana ka tond buya,

⁵kendo gidino itgi mana ka thuol ma otamore winjo dwond jabo thuol, kata bed ni ower mamit machal nadi.

⁶A Ruoth Nyasaye, muk lekegi. Ee, tur leke sibuoche magergi!

⁷Onego gidwon nono ka pi mopuk e lowo, kendo onego giner ka lum minyono e wang’yo.

⁸Mad gichal gi ndach kamnio maleny, kendo lal nono, kata mad gichal gi nyathi monywol kosetho, ma ok oneno chieng’.

⁹Ibetogi ka bungu, ka ok ging’eyo. Nyasaye biro terogi mabor ka pod gingima, kokecho.

¹⁰Joma kare to nobed mamor ka gineno kikumo joricho, kendo giniyor remb jorichogo.

¹¹Bang’e ji nowach niya, “Kara nitie pok ma joma kare yudo! Adier, nitie Nyasaye mang’ado ni piny bura!”