Read luo Zaburi 60 Bible Online

Zaburi 60 - luo bible

Zaburi 60

¹A Nyasaye, isedagiwa, kendo isemiyo olowa. Mirima osemaki kodwa, to koro yie iduog irwa.

²Isemiyo piny otetni, mobarore tiarara, to koro los kuonde mobarorego, nimar ochiegni kethore chuth.

³Isemiyo jogi oneno thagruok mang’eny miwuoro! Adier, isemiyo wakwang’ ka joma omadho kong’o makech!

⁴Ne ichungo bandera, mondo joma oluori ochokre, to ne gilokore, mi giringo wasikgi.

⁵Reswa gi tekoni, kendo winj lemowa, mondo joma ihero oyud konyruok.

⁶Nyasaye nowuoyo gie kar dakne, kowacho niya, “Kaka koro aselocho, abiro dhi mondo apog dala mar Shekem, kaachiel gi holo mar Sukoth ni joga.

⁷Piny Gilead gi piny Manase gin maga. Efraim en oguta, kendo Juda en ludha mar loch.

⁸Piny Moab to nobed mana karacha mar lwok, kendo Edom nobed kama aboloe wuochena. Bende jo-Filistia ne paro ni diloya, mi go mahu adier?”

⁹A Nyasaye, en ng’a mabiro tera e dala mochiel motegno? Koso en ng’a ma notelna ka tera e dala mar Edom?

¹⁰Bende en adiera ni isedagiwa? Donge ibiro dhi e lweny gi jolwenjwa?

¹¹Konywa kedo gi wasikwa, nimar kony mar dhano ok nyal gimoro!

¹²Ka Nyasaye konyowa, to wabiro kedo gi chir, nikech en ema obiro loyonwa wasikwa.