Read luo Zaburi 65 Bible Online

Zaburi 65 - luo bible

Zaburi 65

¹A Nyasaye, ji nyaka paki Sayun, kendo chiwni gik ma gisesingore,

²nikech in e Nyasaye mawinjo lemo mag ji. Ji duto biro biro iri nikech richogi.

³Yaye, kethowa ohingowa, to in ema ing’wononwa kuomgi.

⁴Joma iyiero mondo obi odag e odi maler gin johawi. Gik mabeyo manie odi biro romowa. Gin gik moguedhi mag Hekalu magi maler.

⁵A Nyasachwa kendo jawarwa, idwokowa kitimo gik madongo miresowago. In ema ji duto modak e piny ogeno kuomi, koda ka joma odak kuonde maboyo loka nam.

⁶Iguro gode gi tekoni mondo gisik kuonde ma iketogie. Mano nyiso tekoni maduong’.

⁷Ikueyo wuo mar nam gi mar apaka. Koko mar ogendini bende ikueyo.

⁸Kata mana joma odak kuonde maboyo bedo maluor ka owinjo gik madongo ma isetimo. Timbeni kelo mahu mar mor e tung’ piny gi tung’ piny.

⁹Pile iguedho piny kikelo koth ma miyo obedo momew. Aoreni ok duon, kendo gimiyo puothe nyak maber Mano e kaka iguedho piny!

¹⁰Ikelo koth mathoth e puothe mopur, kendo imiyogi bedo mang’ich.

¹¹Iseguedho piny, omiyo wayudo cham maber. Kamoro amora ma idhiye, cham ng’enyie.

¹²Lege duto jamni opong’o, kendo kor gode duto otimo mor lilo.

¹³Rombe opong’o pewe, kendo holni duto cham onurie. Omiyo gode gi pewe gi holni goyo koko kendo wer nikech gimor.