Read luo Zaburi 68 Bible Online

Zaburi 68 - luo bible

Zaburi 68

¹Nyasaye onego oa malo mondo oke wasike! Jogo mamon kode onego oringe!

²Kaka yamo tero iro mabor, e kaka Nyasaye bende biro riembogi mabor, kendo kaka odok leny but mach, e kaka joricho bende norum e nyim Nyasaye.

³To joma kare nobed gi ilo, kendo nobed mamor e nyime. Adier, ginibed mamor malich!

⁴Weruru ni Nyasaye! Pakuru nyinge gi wer. Ee, denduru Ng’ama ringo gi gache e boche polo. Nyinge en Ruoth Nyasaye. Beduru mamor e nyime.

⁵Nyasaye modak e Hekalu mare maler rango nyithi kiye, kendo rito mond liete.

⁶En ema omiyo joma piny ochamo mier mondoo odagie, kendo ogonyo joma otue, oketo kama ber. Joma odage to nodag mana e piny motwo.

⁷A Nyasaye ma ruodh Sinai, e kinde mane itelo ni jogi king’ado thim,

⁸ piny noyiengni, kendo polo nomiyowa koth, nikech biro mari, yaye Nyasach Israel.

⁹Ne imiyo koth maduong’ ochue, mi oloso piny mane osebedo mool.

¹⁰Jogi iwuon nodak kuno. Kuom ng’wononi nimiyo jochan gik ma gichando.

¹¹Ruoth Nyasaye nogolo wach, mi oganda maduong’ mar mon nolando wach maberno.

¹²Ruodhi gi jolwenjgi noringo lweny, kendo mon manie mier nopogo gik moyaki.

¹³Ne gichalo akuche mobaw gi fedha, kendo ma bwombegi obaw gi dhahabu, To ere gima omiyo jou moko nodong’ adong’a dala, karito rombe?

¹⁴Kane Nyasaye Manyalo Gik Moko Duto okeyo ruodhi e got Zalmon, ne omiyo pe ochue kanyo.

¹⁵Bashan en got maduong’ manadi! En got man gi tunge mang’eny maboyo,

¹⁶to un gode madongo kendo maboyo, ere gimomiyo urango got mane Nyasaye oyiero mondo odagie kusungoru? Ruoth Nyasaye biro dak kanyo nyaka chieng’!

¹⁷Kane Ruoth Nyasaye owuok Sinai kadhi e Hekalu mare, ne en gi geche lweny madongo gana gi gana.

¹⁸ Oidho malo, ka otelo ni joma omako e lweny. Bende oseyudo mich, koda ka kuom joma piem kode. Ruoth Nyasaye nodag kanyo nyaka chieng’.

¹⁹Pakuru Ruoth Nyasaye mating’o chandruokwa pile. En e Nyasaye ma warowa.

²⁰Nyasachwa en Nyasaye makonyo ji. Ruoth Nyasaye e Nyasachwa ma resowa e tho.

²¹Adier, Nyasaye nobar dier wi wasike. Ee, nopuod wi jogo mosiko ka timo richo.

²²Ruoth Nyasaye osewacho niya, “Abiro duogo wasiki ka agolo Bashan. Adier, abiro duogogi, ka agologi e kude mag nam,

²³mondo iyor rembgi kendo guogi magi onang’ remo mang’eny kaka ginyalo.”

²⁴A Nyasaye, kibiro, to ji duto neni, Ee, ji neni, A Nyasaye ma Ruodha, kidonjo e Hekalu mari gi duong’.

²⁵Jower otelo, to jogo thum luwogi ka nyiri magoyo nyiduonge ni e diergi.

²⁶Giwer ka giwacho niya, “Pakuru Nyasaye e chokruok mar joge. Un duto nyikwa Israel, pakuru Ruoth Nyasaye.”

²⁷Dhood Benjamin, ma en dhoot matinie moloyo, ema okwongo biro. Bang’e jotend Juda biro gi ogandagi, kendo jotend Zebulun gi jotend Naftali luwogi.

²⁸A Nyasaye, nyis tekoni ma isekonyowago

²⁹e Hekalu mari man Jerusalem, kama ruodhi kelonie chiwo.

³⁰To kwer piny Misri, machalo gi le mager modak e odunduno, kendo kwer ogendini mamoko, machalo kweth ruedhi gi nyiroye. Giduto mondo gikulreni, ka gikeloni fedha. Ka ogendini duto mohero lweny.

³¹Joote madongo moa Misri nobi iri. Jo-Ethiopia to noting’ bedegi malo ka lami, A Nyasaye.

³²Weruru ni Nyasaye un ogendini mag piny. Ee, weruru wende pak ni Ruoth Nyasaye.

³³Weruru ni Ng’ama ringo gi gache e kor polo ma nyaka nene. Winjeuru ka okok gi duol maduong’

³⁴Huluru teko Nyasaye! Duong’ne okwako Israel, kendo tekone nenore e kor polo.

³⁵Mano kaka Nyasach Israel lich e Hekalu mare! Ochiwo teko gi loch ni joge. Pakuru Nyasaye.