Read luo Zaburi 69 Bible Online

Zaburi 69 - luo bible

Zaburi 69

¹A Nyasaye, resa, nimar pi oima, mochopo e ng’uta!

²Kendo anyumora e chuodho matut, kama onge lowo motegno ma anyalo chungoe. Adier, an e chuny pi matut, kendo apaka chiegni tera.

³Aseywak ni mondo okonya, mi aol, kendo dwonda rama! Wengena bende oowore kuom rangi mondo ikonya.

⁴ Joma mon koda kayiem nono ng’eny, moloyo yie wiwa gi ng’eny, bende joma hangona wach kendo dwaro nega, rateke mokadho! Ne gichuna mondo amigi gik mane ok akwalo.

⁵A Nyasaye, ing’eyo kaka fupa chalo, kendo onge richona kata achiel ma ikia.

⁶Kik iwe akel wichkuot ni joma ogeno kuomi, A Ruoth Nyasaye Manyalo Gik Moko Duto. Kik iwe akel ayany ni jogo malami, yaye Nyasach Israel.

⁷Aseyudo chuny malit ka ji yanya nikech in, kendo wiya okuot ma ok anyal ting’o wang’a.

⁸Achalo ni owetena ka ng’ama pok gineno. Joodwa to achalonigi mana japiny moro nono.

⁹ Hera ma aherogo Hekalu mari wang’o chunya ka mach, kendo ayany ma ji yanyigo ema koro iyanyago.

¹⁰Abolora kasando ringra kendo ka atueyo chiemo, to ji yanya ayanya.

¹¹Arwakora gi pien gugru, to ginyiera anyiera.

¹²Gikuodha e dala, kamoro amora ma giwuothoe kendo jomer chuogona wer ma gijarago.

¹³A Ruoth Nyasaye, an to abiro lami. Dwoka, yaye Nyasaye, e sa asaya mihero, nikech herani duong’ kendo nimar irito singruok mane itimo ni niwar ji.

¹⁴Resa, kik anyumra e chuodho, kendo rita kuom wasika, bende kik iwe pi matut tera.

¹⁵Kik iwe ohula ywoya, kendo kik iwe anim e kut, kata kik iwe bur liel mwonya.

¹⁶A Ruoth Nyasaye, dwoka nikech ber mar herani maduong’ mosiko. Bi ira kuom ng’wononi maduong’.

¹⁷An jatichni, kik ipandna wang’i, to yie idwoka sani nikech an e chandruok maduong’.

¹⁸Bi mondo iwara, kendo iresa e lwet wasika.

¹⁹In ing’eyo kaka ji miya chuny lit, kendo ing’eyo kaka gijara kendo gikuodo wiya, wasika duto bende ineno.

²⁰Ayany ma ji yanyago osenego chunya ma onge kaka akony. Ne ageno ni ji dikecha, to ne ok aneno. Bende ne aparo ni dayud kony, to ne ok ayudo.

²¹ Kane kech kaya, to ne gimiya mana kwiri mondo acham, kendo kane riyo oloya, to ne gimiya mana kong andwayo mondo amadhi.

²² Chiembgi giwegi ema mondo obednigi obadho, kendo sewni ma gitimo onego okelnigi masira!

²³Wang’gi mondo oimre, kik ginen, kendo imi dendgi osik ka kirni.

²⁴A Nyasaye, onego ito mirimbi mager kuomgi, kendo sandgi malit kikecho.

²⁵ Onego kambigi dong’ nono, maonge kata ng’at achiel modong’ ka ngima e hembe,

²⁶nimar gisando ng’ama isekumo, kendo gigoyo siboi ni joma isehinyo!

²⁷Kumgi kuom richogi duto, kendo kik iwe giyud warruok moa kuomi.

²⁸ Onego ruch nyinggi oko e kitap ngima, bende onego kik kwan-gi kaachiel gi joma kare.

²⁹An to an jachan kendo rem rama, omiyo ting’a malo kendo resa, a Nyasaye.

³⁰Abiro pako Nyasaye gi wer, kendo abiro miyo nyinge duong’, ka agoyone erokamano.

³¹Mano biro miyo Ruoth Nyasaye mor, moloyo misango motimne gi rwath, kata bed mana ni en rwath maber manade!

³²Ka jochan neno kamano, to gibiro bedo mamor, kendo jogo malamo Nyasaye, chunygi biro duogo.

³³Ruoth Nyasaye winjo ywak jochan, bende wiye ok wil gi joge motue.

³⁴Un polo gi piny kod nembe, kaachiel gi gik moko duto manie iu, pakuru Nyasaye.

³⁵Enores Sayun, kendo nochak oger miech Juda. Joge nodag kuno, kendo nobed weg piny.

³⁶Ee, nyikwa jotichne nokaw pinyno, kendo jogo mohere nodag kuno.